რუსეთის დუმამ მიხეილ მიშუსტინის პრემიერად დანიშვნას მხარი დაუჭირა. მისი კანდიდატურა რუსეთის პრეზიდენტმა, ვლადიმერ პუტინმა გუშინ, 15 იანვარს წამოაყენა. როგორც BBC-ის რუსული ბიურო წერს, ახალ მიშუსტინი საბოლოოდ პუტინმა უნდა დანიშნოს. უახლოეს მომავალში კი ის ახალ მთავრობასაც ჩამოაყალიბებს.

მიშუსტინის კანდიდატურას 383-მა დეპუტატმა დაუჭირა მხარი. წინააღმდეგი არავინ ყოფილა, 41-მა კი თავი შეიკავა.

"მხარდაჭერის რეკორდი ვერ მოხსენით", — უთხრა მიშუსტინს კენჭისყრის შემდეგ დუმის სპიკერმა, ვიაჩესლავ ვოლოდინმა. მან შეახსენა, რომ 2008 წელს პუტინის გაპრემიერებას 392 დეპუტატმა დაუჭირა მხარი.

15 იანვარს რუსეთის მთავრობა სრული შემადგენლობით ვლადიმერ პუტინის საკონსტიტუციო ცვლილებებზე განცხადებიდან რამდენიმე საათში გადადგა. აწ უკვე გადამდგარმა პრემიერ-მინისტრმა, დიმიტრი მედვედევმა განაცხადა, რომ სურს "გზა გაუთავისუფლოს" პრეზიდენტს ახალი ინიციატივისთვის.

გარდა ამისა, ცნობილი გახდა, რომ პუტინმა მედვედევისთვის ახალი თანამდებობა მოიფიქრა და მას უშიშროების საბჭოში თავის მოადგილედ ნიშნავს.

საკონსტიტუციო ცვლილებებზე პუტინმა ფედერალური კრებაზე მიმართვის დროს ისაუბრა. მისი ინიციატივით, პრემიერ-მინისტრის, ვიცე-პრემიერების, მინისტრებისა და ფედერალური მინისტრების კანდიდატურები დუმამ უნდა დაამტკიცოს. კონსტიტუციის ამჟამინდელი რედაქციით, მთავრობის შემადგენლობას პრეზიდენტი ამტკიცებს.

პუტინის თქმით, ცვლილების შემთხვევაში პრეზიდენტს უფლება არ ექნება უარყოს კანდიდატურა, რომელიც პარლამენტმა დაამტკიცა. ამავე დროს კი, იტოვებს უფლებას, რომ ნდობის დაკარგვის ან არასათანადოდ მუშაობის შემთხვევაში მთავრობის რომელიმე წევრი გადააყენოს.

ამასთანავე პუტინმა დაამატა, რომ პრეზიდენტს სამხედრო ძალებითა და ძალოვანი უწყებების მართვის უფლება უნდა დარჩეს.

უფლებამოსილების გადანაწილების გარდა, რუსეთის პრეზიდენტმა სხვა ცვლილებებზეც ისაუბრა. მისი აზრით, კონსტიტუციის იმ მუხლში, სადაც ზედიზედ ორჯერ პრეზიდენტობის შემდეგ იგივე პოსტის დაკავება იკრძალება, სიტყვა "ზედიზედ" უნდა ამოიღონ.

ვლადიმერ პუტინს რუსეთის პრეზიდენტის თანამდებობა 2000 წლიდან უკავ. 2008-2012 წლებში ის პრემიერ-მინისტრი გახდა, შემდეგ კი ისევ პრეზიდენტობას დაუბრუნდა. 2018 წლის არჩევნებით ის ზედიზედ მეორედ, ჯამში კი მეოთხე ვადით ისევ პრეზიდენტი გახდა. რუსეთის ამჟამინდელი კონსტიტუციით, 2024 წლის საპრეზიდენტო არჩევნებისთვის მას კანდიდატურის დაყენების უფლება არ აქვს.