ბათუმისა და ლაზეთის მიტროპოლიტი, მეუფე დიმიტრი, ამბობს, რომ მეუფე პეტრეს დიდი როლი აქვს გიორგი მამალაძის ციხეში ყოფნის გახანგრძლივებაში. მისი თქმით, მოლოდინი ჰქონდათ, რომ დეკანოზი სინოდის შუამდგომლობის შემდეგ გათავისუფლდებოდა.

"მე დეკანოზმა მამალაძემ მომწერა ის გახმაურებული წერილი, რომლის შინაარსსაც რატომღაც ყოფილი ჭყონდიდელიც არ ახმოვანებდა. თუ არ დამიხსნით ციხიდან მე ამას ყველაფერს ჟურნალისტებს და სააგენტოებს დავურიგებო, ამას წერდა მამალაძე, აწერდა ხელს და ეს არის არის შანტაჟი. იმაში, რომ დღეს მამალაძეს უხანგრძლივდება კიდევ ციხეში ყოფნა ეს ფაქტია, რომ ჭყონდიდელ ყოფილს უსაზღვროდ დიდი როლი აქვს ამაში", — თქვა მთავარ არხთან საუბრისას მეუფე დიმიტრიმ.

მთავარ არხთან მიტროპოლიტმა ასევე აღნიშნა, რომ ის რომ პრეზიდენტსა და პატრიარქს შორის ამ თემაზე წინასწარ იყო განხილვა ტყუილი.

პრეზიდენტმა, სალომე ზურაბიშვილმა საშობაოდ მხოლოდ ხუთი მსჯავრდებული შეიწყალა და მათ შორის ე.წ. ციანიდის საქმის მსჯავრდებული, დეკანოზი გიორგი მამალაძე ვერ მოხვდა. ზურაბიშვილმა მამალაძის არშეწყალების ერთ-ერთ მიზეზად ის დაასახელა, რომ ამას მოსახლეობის დიდი ნაწილი "ვერ გაიგებს და ვერ გაიაზრებს". გარდა ამისა, პრეზიდენტმა აღნიშნა, რომ "პატრიარქის ავტორიტეტისა და მისი სიცოცხლის ხელყოფა ნიშნავს საქართველოს ხელყოფას".

დეკანოზ მამალაძის შეწყალების შუამდგომლობით პრეზიდენტს სინოდმა თითქმის ორი წლის შემდეგ, ოქტომბერში მიმართა.

გიორგი მამალაძის გათავისუფლების მოთხოვნით მის ძმას, თორნიკეს მამალაძეს სექტემბრიდან პარლამენტის წინ კარავი ჰქონდა გაშლილი.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.

ამავე თემაზე: