სახალხო დამცველის აპარატმა დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობის შესახებ სპეციალური ანგარიში წარადგინა.

ანგარიშში განხილულია ანტიდისკრიმინაციულ კანონმდებლობაში არსებული ხარვეზები, სახალხო დამცველის მიერ გამოცემული რეკომენდაციები და ზოგადი წინადადებები, სავარაუდო სიძულვილის მოტივით ჩადენილი დანაშაულების გამოძიების ტენდენცია, სახალხო დამცველის თანასწორობის აპარატის მიერ განხორციელებული და სხვა აქტივობები.

ანგარიშში განხილული განცხადებების ყველაზე მეტი 18 პროცენტი პოლიტიკური და სხვა ნიშნით, სავარაუდო დისკრიმინაციის ფაქტებს ეხება. 17 პროცენტი რელიგიური ნიშნით დისკრიმინაციაზე დაობს, 14 პროცენტი ეროვნული/ეთნიკური წარმომავლობის ნიშნით. წინა წლების მონაცემების მსგავსად 10 პროცენტი სქესობრივი ნიშნით დისკრიმინაციის ფაქტებს შეადგენს, 8 პროცენტი სექსუალური ორიენტაციის/გენდერული იდენტობის ნიშნით, 7 პროცენტი კი შეზღუდული შესაძლებლობების საფუძვლით სავარაუდო დისკრიმინაციის ფაქტებს ეხება.

შეხვედრას ესწრებოდნენ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია, ობმუდსმენის აპარატის და არასამთავრობო ორგანიზაციის წარმომადგენლები.

შეხვედრაზე განიხილეს არსებული გამოწვევები და სამომავლო გეგმები, რომლებიც პრობლემის აღმოფხვრას შუწყობს ხელს. ეკა ბესელიას განცხადებით მნიშვნელოვანია გაიზარდოს სახალხო დამცველის როლი და ომბუდსმენის მექანიზმი იყოს უფრო ქმედითი.

"ჩვენ მოვამზადეთ ცვლილებები სახალხო დამცველის საკანონმდებლო წინადადების საფუძველზე, კომიტეტი გახლდათ ავტორი ამ კანონპროექტის, რომელიც ეხება პროცესუალურ საკითხებს, რაც უფრო მეტად გააძლიერებს სახალხო დამცველის მექანიზმს, რაც თავის მხრივ მნიშვნელოვანია ამ ტიპის განცხადებების თუ საჩივრების შესწავლისა და რეაგირებისთვის. რეაგირების ვალდებულება არის ერთ-ერთი მთავარი ამოცანა, რომელიც ამ საკანონმდებლო პროექტის მომზადების დროს გამოჩნდა. ჩვენ პირველი მოსმენით მივიღეთ ეს ცვლილებები, თუმცა შემდეგ რთული აღმოჩნდა კონსესუსის მიღწევა ამ საკითხზე, რომ ჰქონოდა მხარდაჭერა შემდეგი განხილვის ეტაპზე და ის არის განხილვის პროცესში. მე იმედი მაქვს, რომ ახალ პარლამენტში შესაძლებელი იქნება ჩვენი კოლეგების მხარდაჭერის მობილიზება და ამ ცვლილებების მიღება. ეს ცვლილებები არის მართლაც ძალიან საჭირო და მნიშვნელოვანი. სახალხო დამცველი, რომელსაც აქვს ძალიან მნიშვნელოვანი როლი დისკრიმინაციის ყველა ფორმის გამოვლენის, რეაგირების და პრევენციის თვალსაზრისით. ეს მექანიზმი უნდა იყოს უფრო ქმედითი და ეფექტური, ამისთვის ამ ცვლილებების მიღებაც იქნება ძალიან საჭირო."

საანგარიშო პერიოდი 2015 წლის სექტემბრიდან 2016 წლის აგვისტოს ჩათვლით მიმდინარეობდა. ამ პერიოდში ომბუდსმენმა შეისწავლა 113 საქმე, შეიმუშავა 12 რეკომენდაცია, 4 ზოგადი წინადადება და 6 სასამართლოს მეგობრის მოსაზრება.