საქართველოს დემოკრატიული ინიციატივის ხელმძღვანელის, გიორგი მშვენიერაძის თქმით, პარლამენტმა ღიად დაუჭირა მხარი იმ ადამიანებს, რომლებიც მარტივ სამართლებრივ კითხვებს ვერ სცემდნენ პასუხს. მისივე თქმით, ზოგიერთი კანდიდატის პოზიცია სამარცხვინოც იყო.

"დღეს რაც აქ ვნახე და ეს იყო მძიმე სანახაობა, ეს არის მსუბუქი ფილმი იმასთან შედარებით, რაც რეალურად მოხდა გადაწყვეტილებით... ჩვენ ვნახეთ, რომ პარლამენტის წევრები ერთმანეთს თვალში არ უყურებდნენ, ისე წევდნენ ხელს.

ეს არ იყო არც კომიტეტის სხდომა, ეს არ იყო არც გადაწყვეტილება. სამწუხაროდ, ყველაფერი, რაც აქამდე იყო ვიძახდით, რომ გამჭვირვალე პროცედურებია, წყალში გადაიყარა, რადგან ამას აზრი აღარ აქვს. ეს იყო გამჭვირვალე პროცედურებით კლანის დაკანონება სასამართლო სისტემაში", — განაცხადა მშვენიერაძემ TV პირველის ეთერში.

განახლება: 12 დეკემბრის მოვლენები მოკლედ

დღეს, 12 დეკემბერს სამოქალაქო მოძრაობის აქტივისტებმა და პოლიტიკური პარტიის წარმომადგენლებმა პარლამენტის შესასვლელების პიკეტირება სცადეს, თუმცა დეპუტატები საკანონმდებლო ორგანოში მაინც შევიდნენ. აქციაზე პოლიციამ ჯამში 16 პირი დააკავა.

პარლამენტის უპარტიო დეპუტატი, ეკა ბესელია ამბობდა, რომ მოსამართლეთა არასასესიო კვირაში არჩევა პარლამენტის რეგლამენტს ეწინააღმდეგებოდა. ის რამდენიმე წუთის განმავლობაში კომიტეტის თავმჯდომარეს არ აძლევდა საშუალებას კანდიდატურები განეხილათ.

პროცესის ჩასაშლელად კენჭისყრის დაწყებამდე რამდენიმე წუთით ადრე პლენარულ სხდომათა დარბაზში გაურკვეველი ნივთიერება გაუშვეს, რამდენიმე ადამიანი ცუდად გახდა. ამ მიზეზით სხდომათა დარბაზი დაატოვებინეს დეპუტატებს და კენჭისყრამ რამდენიმე საათით გადაიწია. საქმეზე გამოძიება შსს-მ სისხლის სამართლის კოდექსის 117-ე მუხლით დაიწყო. ამ მუხლით ჯანმრთელობის განზრახ მძიმე დაზიანება მინიმუმ 3-წლიანი პატიმრობით ისჯება. ქართულმა ოცნების ერთ-ერთმა დეპუტატმა მომხდარი ტერორისტულ აქტად, დანარჩენებმა კი ქიმიურ თავდასხმად შეაფასეს. მომხდარზე პასუხისმგებლობა #სირცხვილიამ აიღო.

საბოლოოდ, კენჭისყრა მაინც ჩატარდა და ქართულმა ოცნებამ 14 მოსამართლე უზენაეს სასამართლოში უვადოდ დანიშნა.