ნიკა მელიას წინააღმდეგ 20 ივნისის საქმის სხდომა პროკურორის თხოვნის საფუძველზე გადაიდო, რასაც დეპუტატის ადვოკატი ქართუ ბანკის გაკოტრების საქმეზე განაჩენს უკავშირებს. ნახევარი საათით ადრე ცნობილი გახდა, რომ მელიას 3 წლის ვადით ჩამოერთვა თანამდებობის დაკავების უფლება.

დღეს ამ სხდომაზე უნდა განეხილათ სახალხო დამცველის დოკუმენტი, სადაც ომბუდსმენი ამტკიცებს, რომ დამატებითი ღონისძიებები მელიასთვის არაკონსტიტუციურია. პროკურორის თქმით, მათ ვერ მოასწრეს დოკუმენტის შესწავლა და ვერ იმსჯელებდნენ ამის გარეშე.

მელიას ადვოკატი გიორგი კონდახიშვილი მიიჩნევს, რომ სხდომა დროის გაწელვის მიზნით გადაიდო და მელიას სადეპუტატო უფლებამოსილების შეწყვეტით ომბუდსმენის დოკუმენტს აღარ გაითვალისწინებენ. 20 ივნისის საქმეზე მორიგი სხდომა 24 დეკემბერს ჩაინიშნა, მელიას უფლებამოსილების შეჩერების საკითხი კი პარლამენტმა არაუგვიანეს 15 დღეში უნდა განიხილოს.

"ის ფორსირებული განაჩენი, რომელიც ფაქტობრივად დღეს გამოცხადდა, ისახავდა ერთადერთ მიზანს: ნიკა მელიას უნდა შეუწყდეს პარლამენტის უფლებამოსილება. ეს უხერხულობა, რაც შეიქმნა გავროლოვის ღამის საქმეზე, სადაც სახალხო დამცველის პოზიციით, ნიკა მელიასთან მიმართებით ირღვევა კონსტიტუცია, არ უნდათ, რომ განიხილონ.

სავარაუდოდ, მელიას გაატარებენ პროცედურებს და შეუწყვეტენ მანდატს, შემდეგ პროცესზე კი პროკურატურა იტყვის: სახალხო დამცველმა კი დაწერა დასკვნა, მაგრამ ნიკა მელია დეპუტატი აღარ არის და შეზღუდვები არ უნდა მოეხსნას.

ერთის მხრივ, სასამართლომ არ დაიჭირა მელია და სამართლებრივი გადაწყვეტილება მიიღო, ამას გააპიარებენ... მეორეს მხრივ აიცილეს უხერხულობა და უკანონობა დარჩა ძალაში”.

ნიკა მელიას საქმეები

შვიდი წლის წინ აღძრულ ქართუ ბანკის გაკოტრების საქმეზე დეპუტატ ნიკა მელიას სასამართლომ 25 000-ლარიანი ჯარიმა დააკისრა და 3 წლით თანამდებობის დაკავების უფლება აუკრძალა. მელია საქართველოს პარლამენტის დეპუტატია, რაც იმას ნიშნავს, რომ შესაძლოა, მას უფლებამოსილება შეუჩერონ.

On.ge-სთან საუბარში მელიას ადვოკატი გიორგი კონდახიშვილი განმარტავს, როგორ განვითარდება მოვლენები პროცედურულად. საპარლამენტო მანდატის შეწყვეტისთვის, საპროცედურო კომიტეტმა უნდა გადასცეს დასკვნა პარლამენტის ბიურიოს. ბიუროს შემდეგ ეს თემა ყველა სხვა საკითხზე ადრე უნდა გავიდეს პლენარულ სხდომაზე, სადაც კენჭისყრით, უმრავლესობით [76 ხმა] დეპუტატს უფლებამოსილება შეუჩერდება.

შეგახსენებთ, რომ მელიას უკვე არ აქვს დეპუტატის იმუნიტეტი. საქართველოს პარლამენტის მმართველი გუნდის დეპუტატებმა ეს გადაწყვეტილება პროკურატურის მოთხოვნით, 20 ივნისის საქმეზე მიიღეს.

ამავე საქმეზე ბრალდებული იუსტიციის ყოფილი მინისტრი ზურაბ ადეიშვილი სასამართლომ სრულიად გაამტყუნა და შვიდწლიანი პატიმრობა შეუფარდა. საბოლოო განაჩენით, ადეიშვილს 5 წელი და 3 თვე განესაზღვრა.

საქმე ეხება 2012 წლის დეკემბერში შსს-ს მიერ გაკეთებულ განაცხადს, რომ ორგანიზებულ- დანაშაულებრივ სქემაში სახელმწიფო, პოლიტიკური თანამდებობის პირები და აღმასრულებელი და საკანონმდებლო ხელისუფლების წარმომადგენლები მონაწილეობდნენ. შსს-ს მტკიცებით, მელიას და ადეიშვილის გეგმით, ბიძინა ივანიშვილის ბანკი ქართუ პოლიტიკური ანგარიშსწორების გამო უნდა გაკოტრებულიყო. მაშინ ნიკა მელია აღსრულების ეროვნული ბიუროს ხელმძღვანელის პოსტს იკავებდა.

რაც შეეხება 20 ივნისის საქმეს, მელიას ბრალი სისხლის სამართლის კოდექსის 225-ე მუხლის პირველი და მეორე ნაწილით აქვს წაყენებული. ეს მუხლი ჯგუფური ძალადობის ხელმძღვანელობისა და მასში მონაწილეობას ითვალისწინებს.

პროკურატურა აცხადებს, რომ მელია დემონსტრანტებს პარლამენტში შეჭრისკენ მოუწოდებდა. მელიას განცხადებით, მისი მოწოდება ძალადობრივი არ იყო.