ქართული ოცნება დაჩქარებული წესით იწყებს "მოქალაქეთა პოლიტიკური გაერთიანებების შესახებ" კანონსა და მასთან ერთად "გრანტების შესახებ კანონში", "კორუფციის შესახებ კანონსა" და ადმინისტრაციულ საპროცესო კოდექსში ცვლილებების განხილვას.

"მოქალაქეთა პოლიტიკური გაერთიანებების შესახებ" კანონში შემოთავაზებული ცვლილებების მიხედვით, შემოწირულების მიღება დაუშვებელია საქართველოში ან საქართველოს ფარგლების გარეთ რეგისტრირებული იურიდიული პირისგან ან/და პირთა სხვა სახის გაერთიანებისგან.

ამ მუხლს გაუუქმდა გამონაკლისი, რომელიც ლექცია-სემინარების ჩატარებას გულისხმობდა.
ცნობისთვის, მოქმედ კანონში აღნიშნულია, რომ შემოწირულების მიღება დაუშვებელია საქართველოში ან საქართველოს ფარგლების გარეთ რეგისტრირებული იურიდიული პირისგან ან/და პირთა სხვა სახის გაერთიანებისგან, გარდა ლექციის, სემინარის ან სხვა, მსგავსი საჯარო ღონისძიების უსასყიდლოდ მოწყობისა.

კანონიდან ასევე ამოიღებენ მუხლს, რომლის მიხედვითაც კანონით გათვალისწინებული შეზღუდვები არ ვრცელდება საერთაშორისო ორგანიზაციებსა და იმ იურიდიულ პირებზე, რომელთა მიზანია პარტიების ინსტიტუციური განვითარება. პარტიების ინსტიტუციური განვითარება არ უკავშირდება რომელიმე პოლიტიკური ძალის მხარდაჭერას ან მხარდაჭერისგან თავის შეკავებას.

ცვლილებების მიხედვით, პარტია ვალდებულია წლიურ საფინანსო დეკლარაციაში ასახოს ამ კანონის 261 მუხლით გათვალისწინებული შეზღუდვებისადმი დაქვემდებარებული პირის მიერ გაწეული ის ხარჯები, რომლებიც პარტიის საარჩევნო მიზნებსა და საქმიანობას მოხმარდა. დაჩქარებული წესით განხილვის შედეგად კანონპროექტი, სავარაუდოდ, 18 აპრილს უკვე მიღებული იქნება. კანონი გამოქვეყნებისთანავე ამოქმედდება.

ასევე იხილეთ: