"ძალიან კარგად აიღებს ხელფასს ბატონი თამაზაშვილი, აი, გაჩვენებთ – თქვენი სანქციები არ მუშაობს, ეს შემიძლია გითხრათ", — ასე უპასუხა ოცნების პრემიერმა ირაკლი კობახიძემ ჟურნალისტის კითხვას: "როგორ აიღებს ხელფასს სანქცირებული აჭარის მთავრობის თავმჯდომარე სულხან თამაზაშვილი?"

"ძალიან კარგად აიღებს ხელფასს ბატონი თამაზაშვილი. აი, გაჩვენებთ. არაჩვეულებრივად აიღებს, როგორც აქამდე იღებდა. როგორც ქალაქის პოლიციის უფროსი ის ხელფასს ოფიციალურად იღებდა, როგორც აჭარის მთავრობის თავმჯდომარეც ოფიციალურად მიიღებს ხელფასს. თქვენი სანქციები არ მუშაობს, ეს შემიძლია გითხრათ", — განაცხადა კობახიძემ.

შეგახსენებთ, რომ აჭარის უმაღლესმა საბჭომ, მთავრობის თავმჯდომარედ სანქცირებული სულხან თამაზაშვილი დაამტკიცა. რის შემდეგაც ირაკლი კობახიძემ და მიხეილ ყაველაშვილმა აჭარის ავტონომიური რესპუბლიკის მთავრობის სანქცირებული თავმჯდომარე ადგილობრივი ხელისუფლების წარმომადგენლებს წარუდგინეს.

ირაკლი კობახიძემ და ოცნების არჩეულმა პრეზიდენტმა მიხეილ ყაველაშვილმა აჭარის ავტონომიური რესპუბლიკის მთავრობის თავმჯდომარის პოსტზე სულხან თამაზაშვილი 4 აპრილს, წარუდგინეს საზოგადოებას.

მანამდე აჭარის ავტონომიური რესპუბლიკის მთავრობის თავმჯდომარემ, თორნიკე რიჟვაძემ სოციალურ ქსელში დაწერა, რომ თანამდებობას ტოვებდა.