ქართული ოცნების მაჟორიტარ დეპუტატს, გურამ მაჭარაშვილს, მოძრაობა გაბედეს აქტივისტებმა პრესკონფერენციის ჩატარების საშუალება არ მისცეს. პრესკონფერენციისთვის მისულმა მაჭარაშვილმა მედიაცენტრ მთავარის შენობა საპატრულო პოლიციის დახმარებით დატოვა.

როგოც გაბედეს აქტივისტები აცხადებენ, "ივანიშვილის დავალებების შემსრულებელ ყველა მაჟორიტარს მიუვარდებიან, პრესკლუბებში თავისუფლად სიარულისა და ხალხის მოტყუების საშუალებას არ მისცემენ."

უმრავლესობის დეპუტატი, ერთ-ერთია მათ შორის, ვინც 2020 წლის არჩევნებისთვის სრულიად პროპორციულ სისტემაზე გადასვლას მხარი არ დაუჭირა. ამასთან, მაჭარაშვილი იმ დეპუტატთა შორისაცაა, რომლებიც პროპორციული საარჩევნო სისტემის ჩაგდების შემდეგ დააწინაურეს. მან საპროცედურო საკითხთა და წესების კომიტეტის თავმჯდომარის თანამდებობა დაიკავა.

სამოქალაქო პროტესტი პროპორციული საარჩევნო სისტემის მიღების მოთხოვნით გრძელდება. 28 ნოემბერსა და 9 დეკემბერს დაანონსებულია პარლამენტის მორიგი პიკეტირებები, მანამდე კი აქტივისტები "წერტილოვან დარტყმებს" და ქართული ოცნების წევრებისთვის დისკომფორტის შექმნას გეგმავენ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და მაჟორიტარი დეპუტატის ოლქებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია და პრეზიდენტის რეზიდენცია.

26 ნოემბერს, გამთენიისას პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. დაშავდა 3 ადამიანი, 28 კი დააკავეს. გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამ შეზღუდვას გამოეხმაურა სახალხო დამცველიც. მან განმარტა, რომ მსგავსი შეზღუდვა კანონიერი არაა.