ფრაქცია ქართული ოცნების თავმჯდომარე მამუკა მდინარაძე არარელევანტურად მიიჩნევს თანაგუნდელი მაჟორიტარი დეპუტატის, დიმიტრი ხუნდაძის იდეას სრულად მაჟორიტარულ სისტემაზე გადასვლის შესახებ. მდინარაძის თქმით, მომხდარის ფონზე ამ საკითხის წამოწევა არასწორია და პარლამენტს ამ ცვლილების მიღების რესურსი არ აქვს.

"მითუმეტეს იმ კონტექსტის გათვალისწინებით, რაც ქვეყანაში ხდება. გასაგებია სპეკულაციური პროტესტის ერთი მხარე, ხალხის მოტყუება, რომ გერმანული მოდელი თურმე თავსებადია ჩვენი კონსტიტუციით. აქ არის პოლიტიკური და სამართლებრივი მარაზმი ერთ მხარეს, მაგრამ მეორე მხარეს, დღეს იმაზე ლაპარაკი, რომ მოდით გადავიდეთ ამერიკულ, ბრიტანულ თუ ფრანგულ მოდელზე და რომელიმე ამოვირჩიოთ და სრულიად მაჟორიტარული ახალი ქართული მოდელი შევქმნათ ესეც არა რელევანტურია", — განაცხადა მდინარაძემ.

დეპუტატი ამბობს, რომ შიგნით რამდენიც არ უნდა იკამათონ, გუნდს მაინც არ ჩამოშლიან და "სახელმწიფოებრივად იაზროვნებენ", თუმცა განმარტავს, რომ უმრავლესობის უმრავლესობა ამ ინიციატივას მხარს არ დაუჭერს.

"ვიკამათებთ ამ თემაზე, მაგრამ მინდა კარგად ავხსნა, ვიღაცას შიში რომ არ გაუჩნდეს, რომ რაიმე ახალ მოდელზე გადასვლას ვაპირებთ. ტექნიკურ მხარეს განვმარტავ და ვიტყვი, რომ ჩვენ გვჭირდებოდა მათი, მაჟორიტარების მხარდაჭერა ანუ სრული კონსესუსი გუნდის შიგნით, რათა 113-ზე მეტი ხმა შეეგროვებინა პროექტს, რომელიც ჩვენ დავაანონსეთ. ახლა, ამ შემთხვევაში, ამ ინიციატივას ოპოზიცია ხმას არ მისცემს და თუ გუნდის შიგნით დაჭირდება მხარდაჭერა, მე და ჩემი ძალიან ბევრი კოლეგა, უმრავლესობის უმრავლესობა, ამ ინიციატივას მხარს არ დაუჭერს".

ამავე თემაზე პარლამენტის თავმჯდომარე, არჩილ თალაკვაძემ განაცხადა, რომ გუნდში შეთანხმებული პოზიცია არ არსებობს.

მოსაზრება ახალი სისტემის შესახებ ხუნდაძემ 19 ნოემბერს თავის ფეისბუქგვერდზე გაავრცელა, როცა თბილისში პროპორციული საარჩევნო სისტემის კანონპროექტის ჩავარდნის გამო აქციები იმართებოდა. ხუნდაძეს ჰგონია, რომ პროპორციული საარჩევნო სისტემა ამომრჩეველს დააბნევს, რადგან ვერ განსაზღვრავს, რა ავტორიტეტის ადამიანი დგას ამ პარტიის უკან. დეპუტატი ამბობს, რომ 2024 წლის არჩევნების სრულად პროპორციული წესით ჩატარებაში "საამაყო არაფერია" და პირიქით, "სინანულს უნდა განვიცდიდეთ", რადგან სტრატეგიული შეცდომაა.