ჭყონდიდის ეპარქიის ხელმძღვანელობიდან გადაყენებული მიტროპოლიტი პეტრე გამოდის ინიციატივით, რომ სინოდის შემდეგი სხდომა ღია ეთერში ჩატარდეს. მისი მტკიცებით, მანამ არ შეწყდება ეკლესიის დისკრედიტაცია, სანამ სხდომა ღიად არ ჩატარდება.

მეუფე პეტრეს თქმით, სხდომის ღიად ჩატარების მიზეზი ისიცაა, რომ სინოდის წევრებისგან ცრუ და ურთიერთგამომრიცხავ განცხადებებს ისმენს.

"არის პრეცედენტი, კრეტის კრება ჩატარდა ღია ეთერში, ე.წ. ლაივში გადიოდა მთელი კრება რამდენიმე დღის განმავლობაში", — განაცხადა მეუფე პეტრემ მთავარ არხთან.

31 ოქტომბერს გამართული სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი".

მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

სინოდის სხდომის განჩინებით, პეტრე ცაავას აეკრძალა მღვდელმოქმედება, გათავისუფლდა სინოდის წევრობიდან და ჭყონდიდის ეპარქიის ხელმძღვანელობიდან და "მოსანანიებლად" მონასტერში იქნა გამწესებული. მეუფე პეტრე შიომღვიმეში წასვლაზე უარს აცხადებს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.