პარლამენტში წარდგენილი საკანონმდებლო წინადადებით, გირჩის მღვდელმსახურები სავალდებულო სამხედრო სამსახურს ვეღარ გადაავადებენ. შესაბამისი შინაარსის ინიციატივა ორგანიზაციამ "ერი და სახელმწიფო" ორ ოქტომბერს დაარეგისტრირა.

წინადადების მიხედვით, სამხედრო ვალდებულებისა და სამხედრო სამსახურის შესახებ კანონის 30-ე მუხლის "ლ" ქვეპუნქტი: "არის მღვდელთმსახური ან სწავლობს სასულიერო სასწავლებელში" უნდა შეიცვალოს და ჩამოყალიბდეს შემდეგნაირად: "სწავლობს სასულიერო სასწავლებელში".

დოკუმენტში აღნიშნულია, რომ 27 წლამდე სასულიერო პირი იშვიათია და კანონში მღვდელმსახურისთვის გადავადების უფლების გაუქმება არ იქნება მიმართული რელიგიური კონფესიების წინააღმდეგ.

მარტში მსგავსი კანონპროექტი თავდაცვის კომიტეტის თავმჯდომარემ ირაკლი სესიაშვილიმა წარადგინა, რომლის მიხედვით, არამართლმადიდებელი მღვდელმსახურები სამხედრო სავალდებულო სამსახურის გადავადების უფლებით ვეღარ ისარგებლებენ. მან იდეის გაჟღერებისას განმარტა, რომ ინიციატივა არ გავრცელდება მართლმადიდებელ სასულიერო პირებზე, რადგან მათზე კონკორდატით გათვალისწინებული წესი მოქმედებს.

სესიაშვილმა 2019 წლის 18 მარტს განმარტა, რომ მისი ინიციატივა ყველა რელიგიური კონფესიის წარმომადგენელს ეხება. თუმცა, მისივე თქმით, თუ მართლმადიდებელ მღვდლებს რაიმე სხვა ნორმა იცავს, ეს მის კანონპროექტთან კავშირში არ არის. მეორე დღეს კი ირაკლი სესიაშვილმა თავისი კანონპროექტის განხილვის გადადება ითხოვა.

2017 წელს პარტია გირჩმა რელიგიური ორგანიზაცია დააფუძნა, ვინაიდან კანონი სასულიერო პირებს სამხედრო სამსახურის გადავადების საშუალებას აძლებს. ორგანიზაცია ბიბლიური თავისუფლება სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი, შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.