საკანონმდებლო ინიციატივის მიხედვით, არამართლმადიდებელი მღვდელმსახურები სამხედრო სავალდებულო სამსახურის გადავადების უფლებით ვეღარ ისარგებლებენ. ინიციატივა თავდაცვისა და უშიშროების კომიტეტის თავმჯდომარე ირაკლი სესიაშვილს ეკუთვნის. ამის შესახებ ინფორმაციას ინტერპრესნიუსი ავრცელებს.

სესიაშვილის მტკიცებით, ამ ნორმასთან დაკავშირებით არსებობს ხარვეზები და პრობლემური საკითხები, რომლებსაც დარეგულირება სჭირდება.

"პირები, რომლებიც სინდისის, აღმსარებლობისა და რწმენის თავისუფლების შესაბამისად, უარს განაცხადებენ მოიხადონ სამხედრო სავალდებულო სამსახური, აქვთ კანონიერი უფლება და ვალდებულება, გაიარონ არასამხედრო, ალტერნატიული შრომითი სამსახური სამხედრო სავალდებულო სამსახურის ნაცვლად", — ამბობს სესიაშვილი.

სესიაშვილი განმარტავს, რომ ინიციატივა არ გავრცელდება მართლმადიდებელ სასულიერო პირებზე, რადგან მათზე კონკორდატით გათვალისწინებული წესი მოქმედებს.

ინიციატივასთან დაკავშირებით On.ge ირაკლი სესიაშვილს დაუკავშირდა, რომელმაც გვითხრა, რომ ამ საკითხზე მოგვიანებით ისაუბრებს.