ბოლო 10 წლის განმავლობაში ინგლისსა და უელსში 8 ათასზე მეტი ქალი გარდაიცვალა მიოკარდიუმის ინფარქტით. სიკვდილიანობის ასეთი მაღალი მაჩვენებლის მიზეზი არაჯეროვანი დიაგნოსტირება, მკურნალობა და შემდგომი მზრუნველობაა.

"გაუცნობიერებელი მითები ქალების გადარჩენის რისკს ამცირებენ", — ვკითხულობთ მოხსენებაში.

როგორც აღმოჩნდა, სამედიცინო საფუძველს მოკლებული ისეთი მითები, როგორიცაა "გულის დაავადებები მხოლოდ კაცებს ემართებათ", დღემდე აქტუალურია საზოგადოებაში. ამის გამო, ქალების უმრავლესობა კარდიოლოგიურ რისკებს არ იცნობს და შესაბამისი სამედიცინო დახმარების მოძიებასაც აგვიანებს.

ასევე სრულიად არასწორია, თითქოს ქალსა და მამაკაცს მიოკარდიუმის ინფარქტისას ერთმანეთისგან განსხვავებული სიმპტომები აქვთ. რა თქმა უნდა, კვლევები აჩვენებს, რომ თითოეული უნიკალური შემთხვევის დროს სიმპტომატიკა ძალზე განსხვავებული შეიძლება იყოს, მაგრამ ყველაზე მთავარი და ხშირი ნიშანი, როგორც კაცებში, ასევე ქალებში გულმკერდის არეში ტკივილის შეგრძნებაა.

ბრიტანეთის გულის ასოციაციის მოხსენებაში მოხსენებაში ასევე ხაზგასმით არის აღნიშნული, რომ გულის პრობლემები ახალგაზრდა ასაკის ქალებსაც შეიძლება აღენიშნებოდეთ, რაც ყურადსაღები პრობლემაა.

"მამაკაცების დაავადება"

1960-იან წლებში დიდ ბრიტანეთში გულის შეტევით 10-დან 7 ადამიანი კვდებოდა, დღეს კი 10-დან 7 ადამიანის გადარჩენა ხერხდება.

"გულის შეტევასთან გამკლავების ამდენი მეთოდი არასდროს გვქონია. ახლა კი ქალები ტყუილუბრალოდ იღუპებიან, რადგანაც ამ დაავადებას ისე აღიქვამენ, როგორც მამაკაცების პათოლოგიას და ქალებს, კაცებისგან განსხვავებით, სხვა სტანდარტებით მკურნალობენ", — განაცხადა ექიმმა სონია ბაბუ-რანაიანმა, ბრიტანეთის გულის ასოციაციის სამედიცინო დირექტორმა.

მოხსენების ფარგლებში რამდენიმე მნიშვნელოვანი დასკვნა გამოიკვეთა:

  • ქალები ხშირად აგვიანებენ ექიმთან ვიზიტს;
  • მამაკაცებთან შედარებით, მათ ხშირად არასწორად უსვამენ დიაგნოზს და შესაბამისად არაჯეროვნად მკურნალობენ;
  • ქალების შემთხვევაში რისკ-ფაქტორები (სიგარეტის მოწევა და მაღალი არტერიული წნევა) უფრო მეტად ზრდიან გულის დაავადებების განვითარების ალბათობას;
  • მკურნალობის შემდგომი მოვლა ხშირად სასურველ სტანდარტებს არ შეესაბამება.

ლიდსის უნივერსიტეტის კარდიოვასკულური დაავადებების პროფესორი, კრის გეილი ინგლისსა და უელსში 2002 — 2013 წლებში გულის შეტევების შედეგად სიკვდილიანობის ანალიზის მთავარი მკვლევარი გახლდათ. სწორედ მან აღმოაჩინა, რომ ქალები კარდიოლოგიურ პრობლემებს ტყუილუბრალოდ ეწირებოდნენ.

ეს მხოლოდ დიდი ბრიტანეთის პრობლემა არ არის. მსოფლიოს მასშტაბით ჩატარებული კვლევები მკურნალობაში გენდერულ განსხვავებებზე მიუთითებს, რაც იმის საფუძველია, რომ ვივარაუდოთ: ძალზე ფუნდამენტურ და კომპლექსურ პრობლემასთან გვაქვს საქმე

კრის გეილი

რა არის გულის შეტევის სიმპტომები?

მიოკარდიუმის ინფარქტის ნიშნები ძალზე მრავალფეროვანია და თითოეული ადამიანისთვის იგი შესაძლოა უნიკალური იყოს. თუმცა ყველაზე უფრო ხშირად აღწერილი სიმპტომებია:

  • ზოგადი ხასიათის ტკივილი ან დისკომფორტი გულ-მკერდის არეში, რომელიც მოულოდნელად ჩნდება და მალევე არ გადაივლის;
  • მკერდში შესაძლოა გრძნობდე ზეწოლას ან მოჭერას;
  • ტკივილი შესაძლოა ვრცელდებოდეს მარცხენა ან სულაც ორივე ხელში, ყელის მიდამოში, ქვედა ყბაში ან მუცელში;
  • შესაძლოა თავს გრძნობდე სუსტად, გქონდეს ოფლიანობა და განცდა, რომ გული მიგდის. შეიძლება გიჭირდეს სუნთქვა.

თუ მსგავსი ნიშნები გაქვს, არ გადადო, სასწრაფოდ გამოიძახე 112.