გენიტალური ჰერპესის გამომწვევი ვირუსი, Herpes Simplex 2 (HSV2), ვაგინალური, ანალური ან ორალური სექსით გადაეცემა. დაინფიცირების შემდგომ, ადამიანები ინფექციის მატარებლები მთელი ცხოვრების მანძილზე არიან. ზოგიერთი HSV2 ვირუსი ნერვულ უჯრედებში ახერხებს დამალვას, რის შედეგადაც დაავადება ერთგვარი "მიძინების" ფაზაში გადადის.

ადამიანთა უმრავლესობა ვერც კი ხვდება, რომ ვირუსის მატარებელია. ზოგჯერ ეს უკანასკნელი ძალზე მტკივნეული სიმპტომებით, უმეტესად გენიტალური ბუშტუკების სახით, გამოავლენს თავს. ჰერპესის ვირუსს შეუძლია სიცოცხლისთვის საშიში ისეთი გართულება გამოიწვიოს, როგორიც მენინგიტია და იგი ასევე დაინფიცირებული დედიდან შვილსაც გადაეცემა მშობიარობისას.

ადამიანები ყველაზე მეტად ამ დაავადების გადამცემები მაშინ არიან, როდესაც მათ გენიტალური ბუშტუკები აქვთ, თუმცა შეიძლება ზოგადი სიმპტომები საერთოდ არ იყოს გამოხატული — ვირუსს ეს მაინც არ აჩერებს.

ექსპერიმენტული ვაქცინა

აქამდე ვაქცინის შექმნის მცდელობები უშედეგოდ სრულდებოდა. პენსილვანიის უნივერსიტეტის პროფესორმა, ჰარვი ფრიდმანმა შეიმუშავა ვაქცინა, რის შემდგომაც შესაბამისი ექსპერიმენტებიც ჩაატარა თაგვებსა და გვინეას ღორებზე. აცრის შემდგომ არცერთ ცხოველს გენიტალური ბუშტუკები არ განუვითარდა და თაგვების 98% და გვინეას ღორების 80% „ფარული“ ინფექციებისგანაც აღმოჩნდნენ დაცულნი. სხვა ექსპერიმენტულმა ვაქცინებმა იგივე შედეგის განმეორება ვერ შეძლეს.

"ჩვენი შედეგები თაგვებსა და გვიანეას ღორებზე ჩატარებულ ექსპერიმენტებში წამახალისებელია- ეს ლიტერატურაში აღწერილი ყველაზე კარგი შედეგია. თუმცა, ჩვენ ჯერ არ ვიცით, თუ როგორ იმუშავებს ეს ვაქცინა ადამიანებზე"

ზოგადად ვაქცინების უმეტესობა მოდიფიცირებულ ან ინაქტივირებულ ვირუსებს შეიცავს. ფრიდმანის ვაქცინა მათგან განსხვავებულია — იგი ინფორმაციული რნმ-ს მოლეკულებს შეიცავს. სწორედ ის არის პასუხისმგებელი HSV2-ის 3 ცილის კოდირებაში. როდესაც ეს ინფორმაციული რნმ სხეულში ხვდება, უჯრედები ვირუსული ცილის სინთეზს იწყებენ, რაც საპასუხო იმუნურ პასუხს იწვევს. აქამდე მსგავსი მოქმედების არცერთი ვაქცინა ადამიანებზე არ გამოუცდიათ.

ფრიდმანის ჯგუფი ამჯერად იგივე ვაქცინას ვირუსის Herpes Simplex 1 (HSV1) საწინააღმდეგოდ ტესტავს. HSV1 ვირუსით მსოფლიოს მასშტაბით 10-დან 7 ადამიანია დაავადებული.

თუ ვაქცინა ეფექტური აღმოჩნდება, შესაძლებელია თინეიჯერებმა პაპილომა ვირუსის აცრის (HPV) კვალდაკვალ ჰერპესის საწინააღმდეგოდაც აიცრან. სწორედ პაპილომა ვირუსია თითქმის ყველა საშვილოსნოს ყელის კიბოს გამომწვევი.

მეცნიერთა სხვა ჯგუფი ასევე მუშაობს ნერვულ უჯრედებში მიმალული ვირუსების გასანადგურებლად, რისთვისაც ისინი გენური რედაქტირების ტექნიკას, CRISPR, იყენებენ. რა თქმა უნდა, ამასთან შედარებით დაინფიცირების თავიდან აცილება ცალსახად უკეთესი გზაა.