ერთი შეხედვით ყველამ ვიცით, რომ აქტიური სქესობრივი ცხოვრების პირობებში, ვენერიული დაავადებებისგან თავდაცვის ყველაზე ეფექტური საშუალება პრეზერვატივის გამოყენებაა. თუმცა, კონდომის სწორად გამოყენების შემთხვევაშიც კი სრულად დაცული არავინ არის. აქ ჩვენ მოგიყვებით, თუ რა სხვადასხვა გზები არსებობს სქესობრივი გზით გადამდები დაავადებებისგან თავის დასაცავად.

მამაკაცის პრეზერვატივი

მამაკაცის პრეზერვატივი ყველაზე აქტიურად გამოყენებადი კონდომია. ის ეფექტიანია ისეთი ვენერიული დაავადებებისგან თავდასაცავად, როგორიცაა გონორეა, ქლამიდია, ტრიქომონიაზი და აივ-ინფექცია. აღნიშნული დაავადებები სპერმითა და ვაგინალური სითხის მეშვეობით გადაეცემა პარტნიორს. თუმცა, არსებობს ვენერიული დაავადებები, რომლებიც ასევე კანიდან – კანზე უშუალო კონტაქტით გადაეცემა. მათგან მამაკაცის პრეზერვატივი სრულყოფილად ვერ იცავს. სწორედ ამგვარად შეიძლება დაგემართოს გენიტალური ჰერპესი, ადამიანის პაპილომა ვირუსით გამოწვეული ინფექცია (HPV), სიფილისი და რბილი შანკრი (შანკროიდი).

როგორ უნდა მოიქცე სქესობრივი აქტის დაწყებამდე?

პრეზერვატივი სწორად უნდა შეარჩიო

• უპირველეს ყოვლისა, დარწმუნებული უნდა იყო, რომ ლატექსზე ალერგია არ გაქვს — პრეზერვატივების უმრავლესობა სწორედ ამ მასალისგან არის დამზადებული.
• სწორად უნდა გქონდეს შერჩეული კონდომის სისქე. მაგალითად: ანალური სექსისას თხელი პრეზერვატივი არაპრაქტიკულია და მისი დაზიანების რისკი საკმაოდ მაღალია.
• სწორად უნდა გქონდეს შერჩეული კონდომის ზომა. პრეზერვატივის სიგრძეზე უფრო მეტად მნიშვნელოვანი მისი სიგანეა — ვიწრო კონდომით სექსი უსიამოვნოა, ხოლო განიერით — არაპრაქტიკული.

უნდა დარწმუნდე, რომ კონდომი ვადაგასული არ არის

აუცილებლად შეამოწმე ვადა შეფუთვაზე — ვადაგასული პრეზერვატივი არაეფექტიანია და მისი დაზიანების რისკი საკმაოდ მაღალია.

მზად უნდა გქონდეს ლუბრიკანტი

პრეზერვატივები ლუბრიკანტით ისედაც არის გაპოხილი, მაგრამ ეს შესაძლოა საკმარისი არ აღმოჩნდეს. ამის გამო მისი დაზიანების ალბათობა იზრდება. აუცილებლად გქონდეს მარაგში წყალზე დამზადებული ლუბრიკანტი, რომელსაც საჭიროების შემთხვევაში გამოიყენებ.

როგორ უნდა მოიქცე სექსის დროს?

სწორად გაიკეთე პრეზერვატივი

• შეფუთვა აუცილებლად ხელით უნდა გახსნა (კბილებით და მაკრატლით გახსნისას შეიძლება კონდომი დაზიანდეს).
• პრეზერვატივი სრულად ერეგირებულ პენისზე უნდა გაიკეთო.
• თუ წინდაცვეთა გაკეთებული არ გაქვს, კანი უნდა გადაიწიო ნახევრად ან მთლიანად და კონდომი ისე გაიკეთო.
• სპერმისთვის საჭირო რეზერვუარს უნდა მოუჭირო თითები და ამგვარად გამოდევნი ჰაერს. პრეზერვატივში ჰაერის შეპარვა მისი გახევის ერთ-ერთი მთავარი მიზეზია.
• კონდომი ბოლომდე, პენისის ფუძემდე, მთელს სიგრძეზე უნდა ჩამოიცვა.

რა უნდა გააკეთო კონდომის დაზიანების შემთხვევაში?

თუ ეჭვი გაქვს, რომ სექსის დროს პრეზერვატივი დაზიანდა, დაუყოვნებლივ უნდა შეწყვიტო აქტი და გამოცვალო პრეზერვატივი.

უნდა გამოიყენო ლუბრიკანტი

პრეზერვატივი მუდმივად გაპოხილი უნდა იყოს. წინააღმდეგ შემთხვევაში იგი ადვილად ზიანდება და სექსი არაკომფორტული ხდება.

რა უნდა გააკეთო სექსის შემდეგ?

სწორად უნდა მოიხსნა პრეზერვატივი

დიახ, პრეზერვატივის სწორად მოხსნას დიდი მნიშვნელობა აქვს. შეიძლება აქამდე ყველაფერი სწორად გქონდეს გაკეთებული, მაგრამ ამ ეტაპზე არასწორმა მოქმედებამ სქესობრივი გზით გადამდები დაავადებისგან ვერ დაგიცვას. უპირველესად, პენისის ფუძეზე, პრეზერვატივის ძირს მჭიდროდ იჭერ ხელით, რათა თავიდან აიცილო კონდომის წაძრობა და სპერმის დაღვრა. პრეზერვატივის მოხსნა იწყება სწორედ ძირიდან (და არავითარ შემთხვევაში თავიდან!) — ესაა ის ადგილი, რომელიც ყველაზე ნაკლებად "ისვრება" სექსის დროს. ამის შემდგომ, რეკომენდირებულია ხელების დაბანა ანტიბაქტერიული საპნით.

არ უნდა დაგავიწყდეს გენიტალური ჰიგიენა

სექსის შემდეგ შხაპი (და არა აბაზანა!) ყველაზე პრაქტიკული ჰიგიენაა.

ქალის პრეზერვატივი

ქალის კონდომები არც ისე მარტივად ხელმისაწვდომია. თუმცა ვინ იცის, იქნებ ხელში მაინც ჩაგივარდეს? ამიტომ იცოდე, რომ ეფექტურობის თვალსაზრისით იგი არაფრით ჩამოუვარდება მამაკაცის პრეზერვატივს. თუმცა, მისგან განსხვავებით, კონდომის ეს ტიპი ქალმა შეიძლება სექსამდე გაცილებით ადრე გაიკეთოს და არა უშუალოდ აქტის წინ.

ქალის კონდომის მორგება ტამპონის მოთავსების მსგავსია.

კონდომის შიგნითა, მცირერგოლიანი ნაწილი ღრმად შედის ვაგინაში, ხოლო გარეთა, დიდრგოლიანი მხარე გარეთ რჩება. სექსის შემდეგ, გარეთა, დიდრგოლიანი ნაწილი გადაკეცე, რომ თავიდან აიცილო სპერმის გადმოღვრა, მოკიდე ხელი დიდრგოლიან ნაწილს და ფრთხილად გამოქაჩე.

მამაკაცის პრეზერვატივთან შედარებით, ქალის კონდომის დაზიანების ალბათობა შედარებით მცირეა.

ლატექსის საფენები

ლატექსის დენტალურ საფენებს (იგივე "რაბერდამი/კოფერდამი") სტომატოლოგები თავიანთ საქმეში აქტიურად იყენებენ, თუმცა იგი ასევე მოწოდებულია სქესობრივი გზით გადამდები დაავადებების პრევენციისათვისაც. საქმე ეხება როგორც ორალურ სექსს (კუნილინგუსი/ანილინგუსი) ასევე ქალებს შორის ვაგინალურ სექსსაც.

ლატექსის საფენების გამოყენების დროს პარტნიორები მეტ-ნაკლებად დაცულნი არიან ისეთი დაავადებების გადადებისგან, როგორიც არის გენიტალური ჰერპესი და პაპილომა ვირუსით გამოწვეული ინფექცია. მისი დამზადება სახლის პირობებში, ჩვეულებრივი პრეზერვატივისგანაც შეიძლება.

იმედია, ჩვენი რჩევები გამოგადგება და უსაფრთხო სექსუალური ცხოვრების შესახებ, ამ სტატიის წაკითხვის შემდგომ მეტი გეცოდინება. ჩვენ კი, მომავალში, სქესობრივი გზით გადამდები დაავადებების შესახებ ინფორმაციას ცალ-ცალკე და ამომწურავად მოგაწვდით.