აშშ-ს კონგრესში წარმომადგენლობითმა პალატამ პრეზიდენტ დონალდ ტრამპის იმპიჩმენტის პროცედურა დაიწყო. ამის შესახებ პალატის სპიკერმა, ნენსი პელოსიმ განაცხადა. პროცედურის დაწყება დონალდ ტრამპისა და უკრაინის პრეზიდენტის, ვოლოდიმირ ზელენსკის სატალეფონო საუბრის გარშემო არსებულ სკანდალს უკავშირდება. დემოკრატები, რომლებიც ქვედა პალატას აკონტროლებენ, დონალდ ტრამპს თანამდებობის ბოროტად გამოყენებაში ადანაშაულებენ.

"წარმომადგენლობითი პალატა იმპიჩმენტის საკითხთან დაკავშირებით ოფიციალურ გამოძიებას იწყებს. მითითებას ვაძლევ ექვს კომიტეტს, რათა საკუთარი გამოძიება ჩაატარონ", — განაცხადა პელოსიმ.

დონალდ ტრამპმა და ვოლოდიმირ ზელენსკიმ ტელეფონით 25 ივლისს ისაუბრეს. აღნიშნული სატელეფონო საუბრის შემდეგ ერთ-ერთმა თანამშრომელმა ანონიმურად იჩივლა, რის გამოც ამერიკული სპეცსამსახურის ინსპექტორმა შიდა გამოძიება დაიწყო. თანამშრომლის საჩივრის შესახებ ინსპექტორმა კონგრესს აგვისტოში შეატყობინა, თუმცა მისი შინაარსი კანონიდან გამომდინარე ვერ შეატყობინა. აღნიშნულმა კი დემოკრატებში ეჭვები გააჩინა.

გარდა ამისა, ცნობილი გახდა, რომ ზელენსკისთან საუბრამდე ერთი კვირით ადრე ტრამპმა პირადად გასცა ბრძანება, რომ უკრაინისთვის სამხედრო დახმარება შეეჩერებინათ. აშშ-ს პრეზიდენტმა დახმარების შეჩერება აღიარა და გადაწყვეტილება დაასაბუთა იმით, რომ ევროპის სხვა ქვეყნები, როგორიცაა გერმანია და საფრანგეთი, უკრაინას არასათანადოდ ეხმარებიან. სექტემბრის შუა რიცხვებში კი 400 მილიონი დოლარის დახმარება უკრაინამ, საბოლოოდ, მიიღო.

ზელენსკისთან სატელეფონო საუბარში ტრამპმა ითხოვა, რომ დიდი ყურადღება დაეთმო კორუფციასთან ბრძოლას და ყოფილი ვიცე-პრეზიდენტის, ჯო ბაიდენისა და მისი შვილის, ჰანტერ ბაიდენის საქმიანობის გამოძიებაზე მიუთითებდა. ტრამპის მტკიცებით, მისი მხრიდან ზეწოლას ადგილი არ ჰქონია და საზოგადოებას დაჰპირდა, რომ საუბრის სტენოგრამას გაასაჯაროებდა. ზეწოლას უარყოფდა უკრაინული მხარეც.

ყოფილი ვიცე-პრეზიდენტი ჯო ბაიდენი 2020 წლის საპრეზიდენტო არჩევნებში დონალდ ტრამპის მთავარ კონკურენტად განიხილება. მისი შვილი ჰანტერ ბაიდენი 2014-2019 წლებში კომპანია ბურისმაში დირექტორთა საბჭოს წევრი იყო. ყოფილმა გენპროკურორმა ვიქტორ შოკინმა კომპანიის მფლობელის, ნიკოლაი ზლოჩევსკის წინააღმდეგ სისხლისსამართლებრივი დევნა დაიწყო. უკრაინის ხელისუფლებამ ბურისმას საქმე 2017 წელს დაასრულა და ვერანაირი დარღვევა ვერ გამოავლინა.

შოკინის საქმიანობით დასავლეთში ბევრი ლიდერი იყო უკმაყოფილო, რადგან ამბობდნენ, რომ ის კორუფციას არასათანადოდ იძიებდა. 2015 წლის დეკემბერში კიევში ვიზიტისას ჯო ბაიდენმა შოკინის გათავისუფლებაც მოითხოვა. საბოლოოდ გენპროკურორი თანამდებობიდან 2016 წელს გადააყენეს.

წარმომადგენლობით პალატას იმპიჩმენტის გამოსაცხადებლად მხოლოდ ხმათა უმრავლესობა სჭირდება. თუმცა ამის შემდეგ პრეზიდენტის საკითხს სენატი განიხილავს და იქ უკვე იმპიჩმენტისთვის ხმების ორი მესამედია საჭირო. კონგრესის ზედა პალატაში უმრავლესობას დონალდ ტრამპის თანაპარტიელი რესპუბლიკელები წარმოადგენენ.