სამართლიანი არჩევნების განცხადებით, ხმების პარალელური დათვლის მეთოდოლოგიის საფუძველზე, ხმის მიცემის პროცესი საარჩევნო უბნების აბსოლუტურ უმრავლესობაზე კანონით გათვალისწინებული წესების დაცვით ჩატარდა. ცალკეულ საარჩევნო უბნების მიმდებარე ტერიტორიაზე შეიმჩნეოდა დაძაბულობა, თუმცა აღნიშნულ გარემოებას ერთი გამონაკლისი შემთხვევის გარდა, არსებითი გავლენა არ მოუხდენია კენჭისყრის პროცესზე.

როგორც სამართლიანი არჩევნები აცხადებს, საარჩევნო უბნების 97%-ზე მარკირება მოწმდებოდა კანონით დადგენილი წესისამებრ, რაც იდენტურია 2014 წლის ადგილობრივი თვითმმართველობის არჩევნების მონაცემებთან, როდესაც მარკირება ყოველთვის მოწმდებოდა უბნების 97,3%-ზე. 2012 წლის საპარლამენტო არჩევნებზე მარკირება, ასევე, შემოწმდა უბნების 97%-ზე.

გარდა ამისა, საარჩევნო უბნების 98%-ზე ბიულეტენები სათანადოდ მოწმდებოდა ხელმოწერითა და ბეჭდით, რაც წარმოადგენს მცირედ გაუარესებას 2014 წლის მონაცემებთან შედარებით, რა დროსაც ბიულეტენები სათანადოდ მოწმდებოდა 99,7%-ზე, ხოლო 2012 წლის საპარლამენტო არჩევნების დროს - უბნების 97%-ზე.

მუქარისა და ზეწოლის ფაქტები სამართლიანმა არჩევნებმა დააფიქსირა მხოლოდ საარჩევნო უბნების 1%-ზე. ეს მონაცემი სტატისტიკურად არ განსხვავდება 2014 წლის არჩევნების მონაცემთან, როდესაც 1,3%ზე დაფიქსირდა და ზეწოლის ფაქტები და გაუმჯობესებულია 2012 წლის საპარლამენტო არჩევნებთან შედარებით, როდესაც ეს მონაცემი შეადგენდა 4%-ს.
ამ დროისთვის საუბნო კომისიებში წარდგენილია 81 საჩივარი, 75 საჩივარია საოლქო კომისიებში, ჩანაწერთა წიგნში დაფიქსირებულია 139 შენიშვნა.

საარჩევნო მედიაცენტრმა ამ დროისთვის მუშაობა დაასრულა. პროცესი 9 ოქტომბერს, დილის 10 საათიდან გაგრძელდება, სადაც უკვე პირველადი შედეგები იქნება ცნობილი.