"პენიტენციურ დაწესებულებებში არასათანადო მოპყრობის მაღალი რისკი კვლავაც არსებობს"-ამის შესახებ ომბუდსმენმა, უჩა ნანუაშვილმა დღეს, 5 მაისს, ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე სახალხო დამცველის ანგარიშისა და რეკომენდაციების წარდგენისას განაცხადა.

ომბუდსმენის თქმით, პატიმრებისადმი არასათანადო მოპყრობის სავარაუდო ფაქტებზე გამოძიების დაწყების მიუხედავად, 2015 წელს პენიტენციური დაწესებულებების არცერთი თანამშრომლის მიმართ გამამტყუნებელი განაჩენი არ დამდგარა, რის გამოც დამოუკიდებელი საგამოძიებო სისტემის შექმნის მნიშვნელობა კვლავ დღის წესრიგშია:

"უცვლელია სახალხო დამცველის პოზიცია, რომ წამების, არაადამიანური და დამამცირებელი მოპყრობის ფაქტებზე ეფექტიანი გამოძიების წარმოების უზრუნველყოფისთვის აუცილებელია დამოუკიდებელი საგამოძიებო მექანიზმი შეიქმნას".

ომბუდსმენმა აღნიშნა, რომ ციხეებში წესრიგის დაცვა, პატიმრების მიერ ერთმანეთზე ძალადობის პრევენცია და მათ რეაბილიტაციასა და რესოციალიზაციაზე ზრუნვა სახელმწიფოსთვის ერთ-ერთ უმთავრეს გამოწვევად რჩება. ნანუაშვილმა ხაზი გაუსვა პატიმრობაში მყოფი ბრალდებულების მდგომარეობასაც:

"ჩვენს შეშფოთებას იწვევს ის ფაქტი, რომ მათი [პატიმრობაში მყოფი ადამიანების] კავშირი გარე სამყაროსთან უკიდურესაც შეზღუდულია, რაც უდანაშაულობის პრეზუმფციის პრინციპს ეწინააღმდეგება".

კომიტეტის სხდომაზე ნანუაშვილმა ასევე აღნიშნა, რომ მიუხედავად საქართველოს ხელისუფლების მიერ მართლმსაჯულების სისტემასა და სამართალდამცავ სტრუქტურებში გატარებული რეფორმებისა, ქვეყანაში მთავარ პრობლემად უსაფრთხოების სისტემის სამოქალაქო მონიტორინგის არარსებობა რჩება.

ომბუდსმენმა ისაუბრა სასჯელაღსრულების მეშვიდე დაწესებულებაზეც და იქ არსებული უმძიმესი სანიტარული და ჰიგიენური მდგომარეობის გამო მისი დახურვის რეკომენდაცია კიდევ ერთხელ გასცა.

მან ასევე განმარტა, რომ 2014 წელთან შედარებით 2015 წელს შემცირებულია პატიმრების სუიციდისა და გარდაცვალების მაჩვენებელი:

"ეს მეტყველებს პენიტენციური ჯანდაცვის სფეროში მიღწეულ პროგრესზე, თუმცა ამ მიმართულებით კიდევ მრავალი რამაა გასაკეთებელი".

გარდა ამისა, ომბუდსმენმა სახელმწიფო უსაფრთხოების სამსახურში ე.წ. ოდეერების ინსტიტუტის არსის შეცვლა წინ გადადგმულ ნაბიჯად შეაფასა:

"აღარ არსებობს უწყებათა განუსაზღვრელი წრე, საიდანაც სახელმწიფო უსაფრთხოების სამსახურს განუსაზღვრელი სახისა და მოცულობის ინფორმაცია შეიძლება მიეწოდოს. თუმცა, მიუხედავად ამისა, 2016 წლის მარტში სახელმწიფო უნივერსიტეტში კვლავ გაჟღერდა ინფორმაცია ე.წ. ოდეერების არსებობის შესახებ. ამიტომ, აუცილებელია საკანონმდებლო რეგულაციები პრაქტიკაში ზედმიწევნით შესრულდეს".

ომბუდსმენმა 2015 წელს სახალხო დამცველის ოფისში მოქალაქეების მიღებასა და მათი პრობლემების განხილვა მაღალ აქტივობად შეაფასა. მისი თქმით, აპარატმა 7 ათასამდე განცხადება დაუშვა, რაც საგრძნობლად მაღალი მაჩვენებელია და სახალხო დამცველის ოფისისადმი გაზრდილ მოლოდინებზე მეტყველებს.

აღნიშნული ანგარიში საქართველოს პარლამენტს 31 მარტს წარედგინა.