ევროპული საქართველო ხვალ, 8 სექტემბერს პარლამენტის პლენარულ სხდომაზე ქართული ოცნების მთავრობის ახალი შემადგენლობის დამტკიცებას არ დაესწრება. ამის შესახებ On.ge-ს პარტიის პრესსამსახურში განუცხადეს.

გუშინ, 6 სექტემბერს ევროპული საქართველოს ფრაქციების სხდომაზე გიორგი გახარიას კითხვები მხოლოდ 20 ივნისის აქციის დაშლაზე დაუსვეს, განსახორციელებელი გეგმებით კი არ დაინტერესდნენ.

პლენარულ სხდომას დაესწრებიან პატრიოტთა ალიანსისა და ნაციონალური მოძრაობის დეპუტატები. ბოლო ინფორმაციით, არც ერთი მათგანი არ გეგმავს მთავრობის ახალი შემადგენლობის მხარდაჭერას.

გიორგი გახარიას მთავრობის დამტკიცება დაჩქარებული წესით მიმდინარეობს. ეს პროცესი მას შემდეგ დაიწყო, რაც ზუსტად 5 დღის წინ მამუკა ბახტაძემ თქვა, რომ პრემიერის პოსტს ტოვებდა, ქართულმა ოცნებამ კი თანამდებობაზე ის წარადგინა.