საქართველოს ბანკის მხარდაჭერით, მცირე და საშუალო ბიზნესისთვის გაიმართა შეხვედრა თემაზე — მზის ენერგიის სექტორის განვითარება: ბაზრის ტენდენციები და პრაქტიკული ინსტრუმენტები. ღონისძიება მიზნად ისახავდა განახლებადი ენერგეტიკის სფეროში არსებული შესაძლებლობების, დაფინანსების ინსტრუმენტებისა და ბაზრის მიმდინარე ტენდენციების გაზიარებას.

შეხვედრაზე განიხილეს მცირე და საშუალო ბიზნესისთვის ელექტროენერგიის ხარჯების შემცირების გზები, მიკროსიმძლავრის ელექტროსადგურების მიმართულებით არსებული ტენდენციები, კაპიტალის მოზიდვის შესაძლებლობები და ბიზნესის პრაქტიკული გამოცდილება. ღონისძიებაში მონაწილეობდნენ გალტ & თაგარტის კვლევების დეპარტამენტის, შვეიცარიის განვითარებისა და თანამშრომლობის სააგენტოსა და მის მიერ დაფინანსებული საქართველოს რეგიონებში მცირე და საშუალო საწარმოების განვითარების პროექტის (RSMEDP) წევრები, ასევე ინდუსტრიის წამყვანი კომპანიების — Step Energy, Helios Energy, Envus, Shine Energy და Photomate ხელმძღვანელები.

აღსანიშნავია, რომ ღონისძიებაზე მცირე და საშუალო ბიზნესის წარმომადგენლები პირველები გაეცნენ საქართველოს ბანკისა და RSMEDPის თანამშრომლობით შექმნილ ინსტრუმენტს, მზის პანელის სესხის კალკულატორს, რომელიც ბიზნესებს შესაძლებლობას აძლევს, გამოთვალონ დაზოგილი თანხა მზის პანელების ინსტალაციისა და საკუთარი განახლებადი ენერგიის წარმოების შემთხვევაში.

“საქართველოს ბანკისთვის მწვანე დაფინანსება ერთ-ერთი სტრატეგიული მიმართულებაა. ჩვენთვის მნიშვნელოვანია, რომ მცირე და საშუალო ბიზნესს ჰქონდეს წვდომა არა მხოლოდ ფინანსურ რესურსებზე, არამედ ცოდნასა და პრაქტიკულ გამოცდილებაზეც. სწორედ ამიტომ ერთ სივრცეში გავაერთიანეთ სექტორის ლიდერები, ანალიტიკოსები და საერთაშორისო პარტნიორები, შესაბამისად, ბიზნესი მიიღებს ინფორმაციას იმ შესაძლებლობების შესახებ, რომლებიც მიკროსიმძლავრის ელექტროსადგურების კუთხით არსებობს“, — განაცხადა თორნიკე კუპრაშვილმა, საქართველოს ბანკის მცირე და საშუალო ბიზნესის მიმართულების ხელმძღვანელმა.

საქართველოს ბანკი აგრძელებს მცირე და საშუალო ბიზნესის მხარდაჭერას როგორც სპეციალიზებული ფინანსური პროდუქტებით, ისე საგანმანათლებლო და სადისკუსიო პლატფორმების შექმნით, რომლებიც ქვეყანაში მწვანე ეკონომიკის განვითარებას უწყობს ხელს.