ორმა კაცმა, რომლებიც გასული წლის ოქტომბერში პარიზის ლუვრის მუზეუმიდან 88 მილიონი ევროს ღირებულების სამეფო ძვირფასეულობის ქურდობაში არიან ეჭვმიტანილნი, გამომძიებლებს განუცხადეს, რომ ძარცვის სავარაუდო ორგანიზატორი ნადავლით იმედგაცრუებული დარჩა და მიიჩნია, რომ "მათ მეტის წაღება შეეძლოთ". ამის შესახებ The Guardian წერს.

გამოცემის Le Monde-ის მიერ მოპოვებული მასალების მიხედვით, ეჭვმიტანილები, რომლებიც ადგილობრივი მედიისთვის აბდულაი ნ.-ს და ღელამალა ა.-ს სახელებით არიან ცნობილი, ამტკიცებენ, რომ ლუვრის აპოლონის გალერეაში იმ დამკვეთის მითითებით შეიჭრნენ, რომლის ვინაობის დასახელებაც ოჯახების უსაფრთხოების მოტივითა და შიშის გამო ვერ გაბედეს.

ეჭვმიტანილებმა რვა დასახელების ძვირფასეულობა მოიპარეს, მათ შორის:

  • იმპერატრიცა ევგენიას ბრილიანტის ბაფთისებრი ბროში,

  • იმპერატრიცა ევგენიას დიადემა,

  • ზურმუხტის საყურეები მარი-ლუიზას ნაკრებიდან,

  • ზურმუხტის ყელსაბამი მარი-ლუიზას ნაკრებიდან,

  • დედოფლების, მარი-ამელისა და ორტანსის საფირონის საყურეები,

  • დედოფლების, მარი-ამელისა და ორტანსის საფირონის ყელსაბამი,

  • დედოფლების, მარი-ამელისა და ორტანსის საფირონის დიადემა,

  • რელიკვიარიუმი-ბროში.

თუმცა, გაქცევის დროს, ეჭვმიტანილებს ძვირფასი ქვებით მოჭედილი ის გვირგვინი დაუვარდათ, რომელსაც მე-19 საუკუნეში ნაპოლეონ III-ის მეუღლე, იმპერატრიცა ეჟენი ატარებდა.

"დიახ, მე ვიყავი, ჩანთიდან ამომივარდა", — აღიარა აბდულაი ნ.-მ, როდესაც მოსამართლეებმა ძლიერ დაზიანებული გვირგვინის ფოტო აჩვენეს. მან დასძინა: "რაც ჩავიდინეთ, სწორი არ იყო, ეს ძალიან სერიოზული დანაშაულია".

მისივე თქმით, მათ დარჩენილი ნადავლი სავარაუდო ორგანიზატორს გადასცეს, რომელიც შედეგით "კმაყოფილი არ დარჩენილა".

"მან ჩათვალა, რომ მეტის წაღება შეგვეძლო", — განუცხადა მან გამომძიებლებს.

ორივე კაცმა აღნიშნა, რომ ისინი ძარცვამდე მხოლოდ ორი-სამი დღით ადრე დაიქირავეს. მოსამზადებლად გალერეის შიგნით გადაღებული ვიდეო აჩვენეს, სადაც ჩანდა ვიტრინები ნაპოლეონის დროინდელი ძვირფასეულობით.

Le Mondeის ცნობით, გამომძიებლებს ჯერჯერობით არ დაუდასტურებიათ, რომ მძარცველები ვინმეს დავალებით მოქმედებდნენ.