ევროკომისია სომხეთში ახალი სამოქალაქო პარტნიორობის მისიის (EUPM Armenia) დაწყების შესახებ აცხადებს. მრჩეველთა მისიის მთავარი მიზანია, დაეხმაროს სომხეთის ხელისუფლებას ქვეყნის მედეგობის ამაღლებაში ისეთი თანამედროვე გამოწვევების წინააღმდეგ, როგორიცაა კიბერშეტევები, დეზინფორმაცია, უცხოური საინფორმაციო მანიპულაციები და არალეგალური ფინანსური ნაკადები. ინფორმაციას ევროსაბჭოავრცელებს.

უწყების ინფორმაციით, ორი წლის ვადით განლაგებული მისია სომხეთის სახელმწიფო უწყებებს სტრატეგიულ და ტექნიკურ ექსპერტიზას გაუწევს, თუმცა გადაწყვეტილების მიღების პროცესში მონაწილეობას არ მიიღებს. ევროკავშირში ხაზს უსვამენ, რომ ეს ნაბიჯი სომხეთის სუვერენიტეტისა და დამოუკიდებლობის მხარდაჭერის კიდევ ერთი მკაფიო სიგნალია გარედან არსებული პოლიტიკური თუ ეკონომიკური წნეხის ფონზე.

"გასულ კვირას ევროკავშირმა წარადგინა სომხეთისთვის განკუთვნილი ეკონომიკური და პოლიტიკური მხარდაჭერის ძირითადი პაკეტი, რათა დაეხმაროს მას რუსული ზეწოლის დაძლევაში. დღეს ჩვენ ადგილზე ევროკავშირის ახალ მისიას ვუშვებთ. ევროკავშირის ექსპერტები მხარს დაუჭერენ სომხეთის ხელისუფლებას კიბერსაფრთხეებთან, დეზინფორმაციასთან და უკანონო ფინანსურ ნაკადებთან ბრძოლაში. ევროკავშირი არის მტკიცე, დამოუკიდებელი სომხეთისა და სომეხი ხალხის უფლების — თავად აირჩიონ საკუთარი ბედი — ყველაზე დიდი ქომაგი. ჩვენ უზრუნველვყოფთ, რომ სომხეთი მარტო არ დარჩეს გარე იძულების წინაშე", — განაცხადა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, კაია კალასმა.