საქართველოს ბანკი, როგორც განათლებისა და საზოგადოების განვითარების მთავარი მხარდამჭერი, გაეროს მოსახლეობის ფონდთან (UNFPA) თანამშრომლობით ახალ კამპანიას იწყებს. თანამშრომლობა მიზნად ისახავს საქართველოში შვილების აღზრდაში მეტი ჩართულობისა და მზრუნველი მამობის წახალისებას, თანასწორი მშობლობის მხარდაჭერასა და ოჯახების გაძლიერების ხელშეწყობას.

“კვლევები აჩვენებს, რომ ბავშვის აღზრდაში მამის აქტიური მონაწილეობა დადებითად აისახება როგორც ბავშვის ფიზიკურ, ემოციურ და კოგნიტურ განვითარებაზე, ისე ოჯახის კეთილდღეობაზე. ამასთან, ჩართული მამობა ხელს უწყობს უფრო თანასწორი გარემოს შექმნას, სადაც შვილებზე ზრუნვა ორივე მშობლის საერთო პასუხისმგებლობაა. სწორედ ამ მიზნის განხორციელებაში გავერთიანდით ჩვენ და საქართველოს ბანკი და დავიწყეთ საკმაოდ მნიშვნელოვანი პროექტი და პარტნიორობა”, — განაცხადა ეთერ ნოღაიდელმა, გაეროს მოსახლეობის ფონდის გენდერის პროექტის ანალიტიკოსმა.

თანამშრომლობის ფარგლებში, განხორციელდება სხვადასხვა საგანმანათლებლო აქტივობა, რომლებიც მზრუნველი მამობის მნიშვნელობის გააზრებასა და ამ კუთხით, ცნობიერების ამაღლებას შეუწყობს ხელს.

“მოხარული ვარ, რომ გაეროს მოსახლეობის ფონდთან ერთად ვიწყებთ ძალიან საინტერესო პროექტს, რომელიც გულისხმობს მამებისთვის ისეთი დამატებითი ღირებულების შექმნას, რომლებიც მათ დაეხმარება კიდევ უფრო აქტიურად ჩაერთონ თავიანთი შვილების ყოველდღიურობასა და აღზრდის პროცესში. პროექტი მათ შესაძლებლობას მისცემს, დაესწრონ შეხვედრებს, სადაც მამები შეძლებენ ერთმანეთს გაუზიარონ გამოცდილება, მიიღონ პრაქტიკული ცოდნა და სხვადასხვა სფეროს პროფესიონალებთან ერთად ისაუბრონ იმ ყოველდღიურ გამოწვევებზე, რომლებიც მამობას ახლავს”, — განაცხადა ანა ლომთაძემ, საქართველოს ბანკის CSR მიმართულების ხელმძღვანელმა.

ინფორმაციისთვის, UNFPA საქართველოში წლების განმავლობაში ხელს უწყობს ისეთი გარემოს შექმნას, რომლის პირობებშიც მამობა მხოლოდ პასუხისმგებლობას კი არა, შვილების ცხოვრებაში აქტიურ მონაწილეობას, ემოციურ სიახლოვესა და ზრუნვის თანაბარ განაწილებასაც გულისხმობს. სწორედ ამ ღირებულებების გაძლიერებას ემსახურება საქართველოს ბანკისა და UNFPA-ის პარტნიორობაც.