დღეს, 13 ივლისს, პარლამენტის თავმჯდომარე შალვა პაპუაშვილი თელავში სტიქიის ზონაში ჩავიდა. პაპუაშვილმა 12 ივლისს თელავში მოსულ უხვ ნალექზე საუბრისას თქვა, რომ 4 წლის წინ ღვარცოფის დამცავი ნაგებობები შემოწმდა და "ყველაფერი იყო მწყობრში", რამაც მოსახლეობა სტიქიისგან უფრო მძიმე შედეგებისგან დაიცვა.

"მასშტაბური სტიქია მოხდა თელავში, ფაქტობრივად, როგორც აჩვენა შედეგებმა კვლევებმა, რამდენიმე საათში თელავისთვის თვის ნორმა, 85% მოვიდა, რაც თავისთავად უკვე აჩვენებს, რა მოცულობის სტიქიასთან გვქონდა საქმე. ასეთი მასშტაბის სტიქია ბოლოს 55 წლის წინ იყო თელავში და მაშინ მოეწყო ღვარცოფისგან დამცავი ნაგებობები, რომლებმაც ფაქტობრივად დიდი როლი შეასრულა იმაში, რომ შედეგები არ ყოფილიყო უფრო მძიმე.

თქვენ ნახეთ პირველადი კვლევა, რომელმაც აჩვენა, რომ სწორედ ღვარცოფდამცველებმა შეაკავეს, დამცავმა ნაგებობებმა შეაკავეს ხეების, მორების და ღორღის დიდი ნაწილი, თუმცა თვითონ მასშტაბი იმხელა იყო, რომ ბოლოს გვერდი აუარა თავად ამ ღვარცოფმა იმ სამ ჯებირს, რომელიც იცავდა ღვარცოფისგან ქალაქს და მისი დარჩენილი ნაწილი ჩამოვიდა ქალაქამდე. ვნახეთ, საკმაოდ მოცულობითი არის მასშტაბი სტიქიის და დაზიანების, რომელიც ქალაქს მიადგა," — განაცხადა შალვა პაპუაშვილმა თელავში მომხდარ სტიქიაზე საუბრისას.

ჟურნალისტების განმეორებით დასმულ კითხვაზე, თუ ბოლოს როდის მოხდა ღვარცოფის დამცავი ნაგებობების გაწმენდა, პაპუაშვილმა უპასუხა:

"ღვარცოფის შემკავებელი ოთხი წლის წინ არის გაწმენდილი, ყველაფერი იყო მწყობრში და სწორედ ამიტომაც მან [ღვარცოფის] ძირითადი მასის შეკავება შეძლო. ყველაფერი იყო მწყობრში და სწორედ ამიტომაც შეძლო დამცავმა ნაგებობებმა ღვარცოფის ძირითადი მასის შეკავება. თუმცა ეს სტიქია იმხელა იყო, სადღაც 3-4 საათი წვიმდა, ...მაგრამ კიდევ ერთხელ, ღვარცოფდამცველებმა შეასრულა თავისი როლი და ააცილა დიდი ზიანი თელავს" — განაცხადა პაპუაშვილმა.

12 ივლისს ქალაქ თელავში მოსული უხვი ნალექის შედეგად მდინარე თელავის ხევმა კალაპოტი გაარღვია და ღვარცოფულმა ნაკადმა ქალაქის რამდენიმე ქუჩა დატბორა. გარემოს ეროვნული სააგენტოს პირველადი შეფასებით, ნალექების რაოდენობამ თელავის სადგურზე 57.3 მმ შეადგინა, რაც თელავისთვის თვის ნორმის 85%-ს შეადგენს, ხოლო იყალთოს სადგურზე 40.1 მმ.