"ვაგნერის დაჯგუფების" წევრებმა, რომლებიც ცენტრალური აფრიკის რესპუბლიკაში დარჩნენ ევგენი პრიგოჟინის სიკვდილისა და ჯგუფის ძირითადი აქტივების კრემლის კონტროლქვეშ გადასვლის შემდეგ, მდინარე უბანგის ზემო წელში ნარკოიმპერია ჩამოაყალიბეს. დაახლოებით 500 დაქირავებული მებრძოლისგან შემდგარი ჯგუფი, რომელსაც კერძო სამხედრო კომპანიის დამფუძნებლის ვაჟი, პაველ პრიგოჟინი ხელმძღვანელობს, ხელშეუხებელი დარჩა როგორც ადგილობრივი სამართალდამცავებისთვის, ისე რუსეთის ხელისუფლებისთვის. ამის შესახებ The Wall Street Journal წერს.

"ვაგნერის დაჯგუფების" ახალი ბიზნესის საფუძველი "ტრამადოლის", ძლიერი ტკივილგამაყუჩებლის, ფართომასშტაბიანი კონტრაბანდა გახდა. ნარკოტიკი მასობრივად იყიდება იმ დოზებით, რომლებიც მნიშვნელოვნად აჭარბებს სამედიცინო სტანდარტებს და მიეწოდება ადგილობრივ მაღაროელებს, პრორუსული აქციების მონაწილეებს, ბოევიკებს, ასევე პრეზიდენტის დაცვის წევრებსა და მათ კონტროლქვეშ არსებულ მილიციის ძალებს.

ტრამადოლის სქემა დაქირავებულ მებრძოლებს საშუალებას აძლევს, დააფინანსონ თავიანთი კონტროლი ადგილობრივ ოქროსა და ტყის რესურსებზე. ოქროს უკანონო ექსპორტს ჯგუფისთვის წელიწადში დაახლოებით 180 მილიონი დოლარი მოაქვს, ხოლო ნარკოტიკების კონტრაბანდა დამატებით შემოსავალს აგენერირებს. ნარკოტიკის მოხმარების ზრდა დაემთხვა ბრძოლაში დაღუპულთა რაოდენობის თითქმის 20%-იან მატებას.

გამოცემა წერს, რომ ადგილობრივ პოლიტიკურ და სამხედრო სისტემაში მათი ღრმა ინტეგრაციის გამო, მოსკოვმა ვერ შეძლო სტრუქტურის ამ ნარჩენების საკუთარ კონტროლქვეშ მოქცევა. ამჟამად, "ვაგნერის დაჯგუფების" წევრები ეფექტურად აკონტროლებენ ცენტრალური აფრისკის რესპუბლიკის სახელმწიფო ინსტიტუტებს, წარმოადგენენ რეჟიმის სამხედრო საყრდენს და კონტრაბანდის ნაკადებს მდინარე უბანგის გავლით კონგოსკენ მიმართავენ. მკვლევრები აღნიშნავენ, რომ ცენტრალური აფრიკის რესპუბლიკა რჩება "ვაგნერის" ბოლო საყრდენად აფრიკაში, საიდანაც იგი თავის გავლენას აფართოებს მეზობელ სუდანში, ამბოხებულ "სწრაფი მხარდაჭერის ძალებთან" (RSF) მოქმედებების კოორდინაციის გზით.