ევროკავშირის საბჭომ მოლდოვის რესპუბლიკის შეიარაღებული ძალების მხარდასაჭერად და ქვეყნის საჰაერო თავდაცვის შესაძლებლობების გასაძლიერებლად 120 მილიონი ევროს ღირებულების დახმარების პაკეტი დაამტკიცა. გადაწყვეტილება ევროპული მშვიდობის ფონდის (EPF) ფარგლებში იქნა მიღებული. ინფრომაციას ევროსაბჭო ავრცელებს.

ამ დაფინანსებით მოლდოვის შეიარაღებული ძალებისთვის საშუალო რადიუსის საჰაერო თავდაცვის სისტემას შეიძენენ. აღნიშნული ნაბიჯი ავსებს ევროკავშირის წინა დახმარებებს, რომლებიც საჰაერო თვალთვალისა და თავდაცვის სისტემების გაძლიერებას ისახავდა მიზნად. ბრიუსელში განმარტავენ, რომ ეს მხარდაჭერა მოლდოვის არმიას ოპერატიული ეფექტიანობის ამაღლებასა და მშვიდობიანი მოსახლეობის უკეთ დაცვაში დაეხმარება.

ამ ახალი გადაწყვეტილების გათვალისწინებით, ევროპული მშვიდობის ფონდიდან მოლდოვისთვის გაწეულმა მთლიანმა სამხედრო დახმარებამ უკვე 317 მილიონ ევროს მიაღწია.

ცნობისთვის, ევროპული მშვიდობის ფონდი (EPF) 2021 წლის მარტში შეიქმნა. მისი მთავარი მიზანია სამხედრო და თავდაცვის სფეროებში ერთიანი საგარეო და უსაფრთხოების პოლიტიკის (CFSP) მხარდაჭერა, კონფლიქტების პრევენცია და საერთაშორისო სტაბილურობის შენარჩუნება. ფონდი საშუალებას აძლევს ევროკავშირს, ფინანსურად დაეხმაროს მესამე ქვეყნებსა და რეგიონულ ორგანიზაციებს თავდაცვისუნარიანობის ამაღლებაში.