12 ივლისის დილას თელავში მომხდარ უხვ ნალექზე, რომლის შედეგადაც მდინარე თელავის ხევი ადიდდა და ინფრასტრუქტურა დაზიანდა, "ტვ პირველთან" კომენტარი გააკეთა დედამიწის შემსწავლელ მეცნიერებათა ინსტიტუტის დირექტორმა, ლაშა სუხიშვილმა. მისი თქმით, მსგავსი სტიქია თელავში 50 წლის წინაც მოხდა, მაგრამ "ეს არ ნიშნავს, რომ ყოველ 50 წელში მოხდება და ამიერიდან 50 წელი უსაფრთხოდ იქნება ქალაქი". ლაშა სუხიშვილის შეფასებით, ამ შემთხვევაში გამოსავალი შეიძლება იყოს პროგნოზზე დაფუძნებული შეტყობინების სისტემის არსებობა.

"1977-საც მოხდა მსგავსი სტიქია, მაგრამ ეს არ ნიშნავს, რომ ყოველ 50 წელში მოხდება და ამიერიდან 50 წელი უსაფრთხოდ იქნება ქალაქი. უფრო და უფრო ხშირად მოხდება მსგავსი ნაკადის ფორმირება. შესაძლებელია, რომ ნაკადის ფორმირებას არ ერქვას სტიქიური პროცესი. ამას სჭირდება არხის კარგ კონდიციაში არსებობა, იმისთვის, რომ ნაკადს შეეძლოს მაღალი სიჩქარის განვითარება და სწრაფად გასვლა თელავის ტერიტორიიდან. ამ შემთხვევაში შეიძლება გამოსავალი იყოს პროგნოზზე დაფუძნებული შეტყობინების სისტემა, როცა დათვლილი და შეფასებულია ზღვრული ატმოსფერული ნალექები, შეფასებულია ჰიდროლოგიური თვალსაზრისით წყალშემკრების ნიადაგი, ანუ რა დრო სჭირდება წვიმის მობილიზებას კალაპოტამდე და სხვა პარამეტრები და ამის საფუძველზე წინასწარი საპროგნოზო განგაშის სიგნალის გაშვება", — განაცხადა ლაშა სუხიშვილმა.

12 ივლისს ქალაქ თელავში მოსული უხვი ნალექის შედეგად მდინარე თელავის ხევმა კალაპოტი გაარღვია და ღვარცოფულმა ნაკადმა ქალაქის რამდენიმე ქუჩა დატბორა. გარემოს ეროვნული სააგენტოს პირველადი შეფასებით, ნალექების რაოდენობამ თელავის სადგურზე 57.3 მმ შეადგინა, რაც თელავისთვის თვის ნორმის 85%-ს შეადგენს, ხოლო იყალთოს სადგურზე 40.1 მმ.