ირაკლი კობახიძემ ეუთო-ს საპარლამენტო ასამბლეა დიფ სთეითთან კავშირში დაადანაშაულა. კობახიძის განმარტებით, ბოლო კრიტიკული რეზოლუცია "სამარცხვინო ბრალდებებს" შეიცავს და მიზანი მმართველი პარტიის "დიფ სთეითის მორჩილი აგენტურით" ჩანაცვლებაა.

"არსებობს ცნობილი გამონათქვამი, რასაც პეტრე ამბობს პავლეზე, პეტრეზე მეტს ამბობს, ვიდრე პავლეზე. ეს გამონათქვამი ეუთოს საპარლამენტო ასამბლეის მიერ რამდენიმე დღის წინ მიღებულ აბსურდულ რეზოლუციას საუკეთესოდ აფასებს.

არაფორმალური ოლიგარქიული გავლენებით მოქმედი სხვა ევროპული ინსტიტუტების მსგავსად, უკვე ეუთოც ღიად ჩართეს პროცესში, რომლის მიზანი უსამართლო და სამარცხვინო ბრალდებებით, სანქციებით და ზეწოლის თუ შანტაჟის სხვა ბერკეტების გამოყენებით, საქართველოში ხელისუფლების შეცვლა და "დიპ სთეითის" მორჩილი აგენტურით მისი ჩანაცვლებაა," — განაცხადა კობახიძემ.

კობახიძის განმარტებით ქართულ ოცნებას სურს "ბრიტანული დიპ სთეითის ჩამოშლა, რომელიც ამერიკულზე უფრო ძველი და ფესვგადგმულია" და მაგალითად მოიშველია აშშ-ის პრეზიდენტის დონალდ ტრამპისა და ბრიტანეთის ყოფილი პრემიერმინისტრის, ლიზ ტრასის გამონათქვამები.

"ჩვენ გვსურს ბრიტანული "დიფ სთეითის" ჩამოშლა, რომელიც ამერიკულზე უფრო ძველი და ფესვგადგმულია. ტრამპისა და ტრასის ეს სკანდალური განცხადებები, აგრეთვე სხვა პოლიტიკური ლიდერებისა და ანალიტიკოსების საჯარო გამოსვლები არაფორმალური ოლიგარქიული გავლენებისა და კორპორაციული მმართველობის საფრთხის შესახებ, "დიპ სთეითის" არსებობისა და მისი გავლენის უტყუარობის შესახებ ყველა კითხვის ნიშანს აქარწყლებს," მინდა ასევე შეგახსენოთ ამერიკის მოქმედი პრეზიდენტის, დონალდ ტრამპისა და ბრიტანეთის ყოფილი პრემიერმინისტრის, ლიზ ტრასის გამონათქვამები: "ან ჩვენ გავანადგურებთ დიფ სთეითს, ან დიფ სთეითი გაანადგურებს ამერიკას," — თქვა კობახიძემ.

შემდეგ კობახიძემ გაიმეორა, რომ ეუთოს საპარლამენტო ასამბლეის მიერ მიღებული რეზოლუცია აბსურდულ ბრალდებებს შეიცავს და მისი განმარტებით, მათი მიზანი "ხელისუფლებაში მათი მორჩილი აგენტურის დაბრუნებაა".

"სწორედ ამ პროცესის ნაწილია ეუთოს საპარლამენტო ასამბლეის მიერ მიღებული რეზოლუციაც, რომელიც სრულად იმეორებს აბსურდულ ბრალდებებს, რომლებსაც არაფორმალური ოლიგარქიული გავლენებით მოქმედი ევროპული ბიუროკრატია საქართველოში რადიკალიზმისა და რევოლუციური პროცესების წასახალისებლად იყენებს. რაც, მათის გათვლით, საბოლოოდ ხელისუფლების ცვლილებით და ხელისუფლებაში მათი მორჩილი აგენტურის დაბრუნებით უნდა დასრულდეს," — განაცახდა მან.

ჟურნალისტის დასმულ კითხვაზე, გააგრძელებს თუ არა საქართველო ეუთოსთან თანამშრომლობას, კობახიძემ განაცხადამ რომ ეს ეუთოს ქმედებებზეა დამოკიდებული.

"ეუთოსთან თანამშრომლობა გაგრძელდება, თუმცა ამ თანამშრომლობის ხარისხი დამოკიდებული იქნება იმაზე, თუ რომ როგორ განაგრძობს თავად ეუთოს საპარლამენტო ასამბლეა თავის საქმიანობას. დარჩება კვლავაც ჯო უილსონის დონეზე, თუ ამაღლდება ჯო ულსონის დონეზე ზემოთ. ეს იქნება პრინციპული მნიშვნელობის საკითხი საკუთრივ საქართველოს დელეგაციისა და ეუთოს საპარლამენტო ასამბლეის თანამშრომლობისთვის. ვნახოთ, როგორ გაგრძელდება პროცესები. კიდევ ერთხელ გავიმეორებ, რომ თანამშრომლობის ხარისხი დამოკიდებული იქნება თავად ეუთოს საპარლამენტო ასამბლეის შემდგომ საქმიანობაზე", — განაცხადა კობახიძემ.

ეუთო-ს საპარლამენტო ასამბლეამ, 8 ივლისს მიიღო რეზოლუცია "საქართველოში საარჩევნო კეთილსინდისიერებისა და ფუნდამენტური თავისუფლებების დაცვის შესახებ", რომლის ინიციატორი ამერიკელი კონგრესმენი ჯო უილსონია.

საქართველოს დელეგაციამ უარი თქვა ეუთო-ს საპარლამენტო ასამბლეაზე გამართულ კენჭისყრაში მონაწილეობაზე, სადაც საქართველოს საკითხზე კრიტიკული რეზოლუცია მიიღეს. მათ სხდომა პროტესტის ნიშნად დატოვეს.

პარლამენტის საგარეო ურთიერთობათა კომიტეტის თავმჯდომარის ნიკოლოზ სამხარაძის განცხადებით, დეკლარაციის შესწორებული ვერსიის ცალკეული ნაწილები განზრახ ამახინჯებს საქართველოში არსებულ პოლიტიკურ რეალობას.