პროკურატურის განცხადებით, 20-21 ივნისს აქციის მონაწილის მიმართ უფლებამოსილების გადამეტების ბრალდებით, სისხლის სამართლის პასუხისგებაში მიეცა შსს-ს კიდევ ერთი თანამშრომელი.

გამოძიების მტკიცებით, 21 ივნისს, გამთენიისას, რუსთაველის გამზირზე, შინაგან საქმეთა სამინისტროს თანამშრომელმა ფიზიკურად იძალადა ადმინისტრაციული წესით დაკავებულ პირზე, მაშინ, როდესაც არ არსებობდა დაკავებულის მიმართ ფიზიკური ძალის გამოყენების წინაპირობა და აუცილებლობა.

შინაგან საქმეთა სამინისტროს თანამშრომელს ბრალდება წარედგინა საქართველოს სისხლის სამართლის კოდექსის 333-ე მუხლის მესამე ნაწილის ბ ქვეპუნქტით.

პროკურატურა მიმართავს სასამართლოს შუამდგომლობით ბრალდებულის მიმართ აღკვეთის ღონისძიების სახით პატიმრობის გამოყენების მოთხოვნით.

20 ივნისის აქციის დაშლა ხელისუფლებამ გაფრთხილების გარეშე დაიწყო. ამ პროცესში დაშავდა მინიმუმ 240 ადამიანი, 30-ზე მეტი ჟურნალისტი. ორ ადამიანს ამოაჭრეს თვალი. სპეცრაზმის თანამშრომლები დამიზნებით ესროდნენ მოქალაქეებს. ამ საქმეზე შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა.