საქართველოს სახალხო დამცველი ნინო ლომჯარია სოფელ გუგუტიანთკარში ჩავიდა და ბორდერიზაციის უკანონო პროცესს გაეცნო, დაათვალიერა ადგილები, სადაც ოკუპანტები თხრილებს ავლებენ და კონტრუქციებს ამონტაჟებენ.

მისი თქმით, შეხვდა ადგილობრივ მოსახლეობას და მოისმინა მათი პრობლემები. ომბუდსმენმა დაადასტურა, რომ ე.წ. საზღვრის მიღმა ორი სახლი ექცევა. ამ ოჯახებს ოკუპანტებმა სამი დღე მისცეს სახლის დასაცლელად.

"ვნახე, რომ ორი სახლი ექცევა საოკუპაციო ხაზის მიღმა. ვესაუბრე ერთი სახლის მესაკუთრეს. ეს ოჯახი აკეთებს დემონტაჟს, რომ რაიმე მაინც გამოიტანოს სახლიდან. უთხრეს, რომ სამ დღეში უნდა დაცალონ, თორემ სამი დღის შემდეგ ვეღარ შეძლებენ შესვლას. ძალიან მძიმე ადამიანური ტრაგედიაა, რასაც ჩვენ ვუყურებთ და რაც ხდება შიდა ქართლში", — განაცხადა ნინო ლომჯარიამ.

მან მიმართა ხელისუფლებას დაეხმაროს იმ ორ ოჯახს, რომელიც კარგავს სახლს.

"ის ოჯახი, რომელიც ახდენს შენობის დემონტაჟს, ცხოვრობს გორში და დღემდე არ აქვთ დაკანონებული საცხოვრებელი. მინდა მივმართო ხელისუფელბას, რომ ხელი შეუწყონ ამ ადამიანებს, რადგან ემოციურად მორალურად მძიმეა", — განაცხადა ნინო ლომჯარიამ.

მან გუგუტიანთკარში მიმდინარე პროცესს ჰუმანიტარული კატასტროფა უწოდა და ადამიანის უფლებების, საკუთრების უფლების დარღვევაზე გაამახვილა ყურადღება.

15 აგვისტოს გორის მუნიციპალიტეტის სოფელ გუგუტიანთკარში საოკუპაციო რეჟიმმა ე.წ. საზღვრის გავლების უკანონო პროცესი განაახლა. საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ეს ოჯახები სწორედ ამ მიწის ნაკვეთებს ამუშავებდნენ და მოსავალი მოჰყავდათ. შესაძლოა, ოკუპირებულ ტერიტორიაზე მოხვდეს სოფლის მთავარი სარწყავი არხიც. შედეგად, ადგილობრივები წყლის გარეშე დარჩებიან. გორის საკრებულოს წარმომადგენელმა თქვა, რომ ამ საკითხზე რუს სამხედროებს ესაუბრა, რომლებმაც უთხრეს, რომ წყლის რეზერვუარს საქართველოს არაკონტროლირებად ტერიტორიაზე არ მოაქცევდნენ.

სახელმწიფო უსაფრთხოების სამსახურში On.ge-ს უთხრეს, რომ ორჯერ გაააქტიურეს ცხელი ხაზი, ინფორმირებულია ევროკავშირის სადამკვირვებლო მისია. ამავე სოფელში მავთულხლართების გაბმა დაიწყეს 7 აგვისტოსაც, მოგვიანებით კი სამუშაოები შეწყდა, ოთხი დღის შემდეგ კი ისევ განახლდა.

ამავე თემაზე: