საქართველოს მე-5 პრეზიდენტმა, სალომე ზურაბიშვილმა ბრიფინგზე განაცხადა, რომ ცვლილებები დიპლომატიური სამსახურის კანონში აწესებს ტოტალურ კონტროლს ქართველ დიპლომატებზე.

"დიპლომატიური სამსახურის ზოგიერთ მეთაურს პარლამენტში სამარცხვინო სხდომა და გამოსვლები ჰქონდა, რომლებმაც ახალი კანონი წარადგინეს, რომელიც რეალურად დიპლომატებზე, ჩვენს ელჩებზე საზღვარგარეთ, ქართული ოცნების ტოტალურ კონტროლს აწესებს. კერძოდ, თუ მათ ჩვენს საგარეო კურსს გადაუხვიეს, შეუძლიათ, ნებისმიერ დროს როტაციის მიუხედავად, მოხსნან.

ალბათ, საჭიროა, რომ დღეს ყველა მოხსნან, რადგან დღეს, ყველას გადახვეული აქვს იმ კურსისთვის, რომელიც ჩვენს კონსტიტუციაში ასახულია. ეს კონსტიტუცია ჯერ შეცვლილი არ არის და ყველა არაკონსტიტუციურად იქცევა, ვინც მიჰყვება ქართული ოცნების ინსტრუქციებს სხვადასხვა დედაქალაქში, სადაც ისინი წარმოდგენილები არიან", — განაცხადა ზურაბიშვილმა.

ოცნების პარლამენტმა დაჩქარებული წესით განიხილა და 87 ხმით გუშინ, 14 მაისს მიიღო "დიპლომატიური სამსახურის შესახებ" კანონში ცვლილება.

"დიპლომატიური სამსახურის შესახებ" კანონს ემატება ნორმები, რომელიც დიპლომატებს ეთიკისა და ქცევის წესების დაცვას ავალდებულებს. ჩაითვლება თუ არა ეთიკის დარღვევად პროევროპულ პეტიციაზე ხელმოწერა? — მინისტრის მოადგილემ, ხათუნა თოთლაძემ ამ კითხვაზე ჟურნალისტებს არ უპასუხა.