ჰელსინკის კომისია X-ზე წერილს ავრცელებს, რომელშიც აშშ-ის, გაერთიანებული სამეფოს, პოლონეთის, ლიეტუვის, ლატვიის, უკრაინის და შვედეთის დელეგაციის ხელმძღვანელები და კომისიის სხვა წევრები პორტუგალიას მოუწოდებენ ქართულ ოცნებას ეუთოს საპარლამენტო ასამბლეის (OSCE PA) 32-ე ყოველწლიურ სესიაზე მონაწილეობის უფლება არ მისცეს.

წერილში ვკითხულობთ, რომ ოცნების მონაწილეობა ძირს გამოუთხრის ეუთოს პრინციპებს და ამით მათი ძალადობრივი და დიქტატორული მმართველობის ლეგიტიმაცია მოხდება.

"მოვუწოდებ თქვენს მთავრობას, უარი უთხრას ვიზებზე ან სხვაგვარად შეუშალოს ხელი ქართული ოცნების მთავრობის წევრების მონაწილეობას ამ მნიშვნელოვან შეხვედრაზე.

ქართული ოცნების მთავრობა სისტემატურად ძირს უთხრის საქართველოში დემოკრატიას —მონაწილეობს ფართომასშტაბიან საარჩევნო გაყალბებაში, ძალადობრივად ახშობს მშვიდობიან პროტესტებს და აპატიმრებს ჟურნალისტებსა და სამოქალაქო აქტივისტებს, რომლებიც მისი ავტორიტარული მმართველობის წინააღმდეგ გამოდიან.

მათი ქმედებები პირდაპირ ეწინააღმდეგება იმ დემოკრატიულ ღირებულებებს, რომელთა მხარდაჭერასა და დაცვას პორტუგალია და ეუთოს საპარლამენტო ასამბლეა ცდილობენ.

ქართული ოცნების მთავრობის წევრებისთვის ამ პრესტიჟულ სესიაზე დასწრება მათ რეპრესიულ მმართველობას ლეგიტიმაციას და ისეთ პლატფორმას მისცემს, რომელსაც ისინი არ იმსახურებენ.

მათი მონაწილეობა ძირს გამოუთხრის ეუთოს პრინციპებს და არასწორ გზავნილს გაუგზავნის მათ, ვინც დემოკრატიისთვის იბრძვის საქართველოში და მის ფარგლებს გარეთ.

პორტუგალიამ, როგორც დემოკრატიული იდეალების ურყევმა დამცველმა, მტკიცე პოზიცია უნდა დაიკავოს ავტორიტარიზმის წინააღმდეგ და მათი შესვლა აკრძალოს," — ნათქვამია წერილში.

ეუთოს სხდომა 29 ივნისიდან 3 ივლისამდე პორტუში გაიმართება. წერილს თანდართული აქვს OSCE PA-ში აშშ-ის, გაერთიანებული სამეფოს, პოლონეთის, ლიეტუვის, ლატვიის, უკრაინისა და შვედეთის დელეგაციების 28 წევრების ხელმოწერები.