ქართული ოცნების პრემიერმინისტრის, ირაკლი კობახიძის თქმით ევროკავშირის ელჩი საქართველოში, პაველ ჰერჩინსკი ძალიან ცუდ მდგომარეობაშია, რადგან მისი განცხადებები მძიმედ აისახება ქართველი ხალხის თვალში და დასძინა, რომ ჰერჩინსკის სურს იყოს ელჩი საქართველოში, მაგრამ სამწუხაროდ "დიფ სთეითი" ამის საშუალებას არ აძლევს.

"მას არ აძლევენ საშუალებას, რომ იმუშაოს როგორც ელჩმა, ეს არის ერთი კონკრეტული შეფასება, რაც მინდა გავაკეთო. ის არის ძალიან მძიმე მდგომარეობაში, აკეთებინებენ ისეთ განცხადებებს, რომლებიც ძალიან მძიმედ აისახება მის იმიჯზე ქართული საზოგადოების თვალში. ძალიან ტრაგიკულია, ძალიან სამწუხაროა ეს ყველაფერი. მე დარწმუნებული ვარ, რომ ბატონ ჰერჩინსკის უნდა ელჩობა საქართველოში, თუმცა მას "დიფ სთეითი" არ აძლევს, სამწუხაროდ, ამის საშუალებას," — თქვა კობახიძემ.

შეგახსენებთ, 14 მაისს ჰერჩინსკიმ აღნიშნა, რომ EU აგრძელებს მუშაობას იმ მიზნით, რომ ერთობლივი სანქციები დაუწესონ საქართველოში მიმდინარე აქციებზე განხორციელებულ ძალადობაზე პასუხისმგებელ პირებს. ელჩმა ასევე დასძინა, რომ ამისთვის 27-ვე ქვეყნის ერთსულოვანი თანხმობაა საჭირო.