თბილისის საქალაქო სასამართლოში პროევროპულ აქციებში მონაწილეობისთვის, ჯგუფური ძალადობის ბრალდებით დაკავებული 11 პირის — ანდრო ჭიჭინაძის, ონისე ცხადაძის, გურამ მირცხულავას, ჯანო არჩაიას, ლუკა ჯაბუას, რუსლან სივაკოვის, რევაზ კიკნაძის, გიორგი ტერაშვილის, ვალერი თეთრაშვილის, სერგეი კუხარჩუკისა და ირაკლი ქერაშვილის სასამართლო პროცესი მიმდინარეობს.

სხდომა ბრალდებულ რევაზ კიკნაძის განცხადებით გაიხსნა.

კიკნაძემ სიტყვაში ოპოზიციური პარტიის წარმომადგენლებს მიმართა, რომ თეა წულუკიანის კომისიაზე არ მისვლისთვის დაკისრებული გირაო არ გადაიხადონ.

"გუშინ ისეთი რაღაც მოხდა, რომ ეს ნიშნავდა, რომ ყველაფერზე ხელი აიღო მთავრობამ და ყველაფერს ვიკადრებო, ვისაც მინდა დავიჭერო. ამაზე მინდოდა მეთქვა, რომ ე მანდ ხელი არავის წაგიცდეთ და ის გირაო არავინ გადაიხადოთ. ეს ნიშნავს ჩვეულებრივ ღალატს და თანამებრძოლის მიტოვებას. ყველანაირ პატივისცემას დაკარგავთ, რაც აქამდე გქონდათ. ჩვენც შეგვეძლო რაღაცებზე ხელი მოგვეწერა და გავსულიყავით აქედან, მაგრამ არ ვიკადრეთ. თქვენც ნუ იკადრებთ და ბრძოლას ნუ ჩაეხსნებით. ციხეში მოხვედრა არ არის კატასტროფა, კატასტროფა არის როცა ბრძოლას გაურბიხარ, როცა შენი თანამებრძოლები იბრძვიან ქვეყნის გადასარჩენად. ბოლოს მოგვკლავს შეწუხებული სინდისი ან თავის გადასარჩენად გადახდილი გირაო და არა ჩალურჯებული თვალი, ჩატეხილი კბილი თუ 1 წლით ნახეხი დილეგი," — თქვა სინდისის პატიმარმა, რეზო კიკნაძემ სასამართლო პროცესზე.

შეგახსენებთ, 14 მაისს ყოფილი თავდაცვის მინისტრი, ირაკლი ოქრუაშვილი სასამართლო დარბაზში დააკავეს ოცნების პარლამენტის დროების საგამოძიებო კომისიაზე არ გამოცხადებისთვის დაკისრებული გირაოს გადაუხდელობის გამო.

შემდეგ კიკნაძემ წინა სასამართლო პროცესზე პროკურატურის ცრუმოწმესთან დაკავშირებით განცხადება გააკეთა:

"მე-6 თვეა, დაგვატარებთ და თუ გვისჯით, მოგვისაჯეთ, თუ არა და დაგვანახეთ, რომ სამართალი არსებობს.

მოწმე ჩვენთან კავშირში ხომ უნდა იყოს? წინა მოწმეზე მინდოდა განმეცხადებინა, რომ ფაქტობრივად, ჩვენი დაცინვა იყო. თვითონ ამბობს 28 ნოემბრის საღამოს 12-ის ნახევრის მერე არ ვყოფილვარო იმ აქციაზეო და ისეთი ადამიანი მოგვიყვანეთ, იმავე წარმატებით შეგეძლოთ მოგეყვანათ პაკისტანი-ინდოეთის ომში დაზარალებული და იგივე კავშირი ექნებოდა ჩვენთან. იმიტომ რომ ჩვენ გვედავებიან 29 ნოემბერს და შემდეგ თარიღებს, აქ ვინც ვართ და სხვა თარიღის მოწმე რა შუაშია?," — თქვა კიკნაძემ.

შეგახსენებთ, 11-ვე დაკავებულს ბრალი საქართველოს სისხლის სამართლის კოდექსის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს. მუხლი სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.