უკრაინის პრეზიდენტის, ვოლოდიმირ ზელენსკის თქმით, სტამბოლში დაგეგმილ მოლაპარაკებებზე უკრაინის დელეგაციას თავდაცვის მინისტრი რუსტემ უმეროვი უხელმძღვანელებს.

ზელენსკიმ ასევე დასძინა, რომ მოლაპარაკებებზე რუსეთის მხრიდან გაგზავნილი დელეგაცია მეტყველებს, რომ მოსკოვი დიალოგს არასერიოზულად უყურებს — პუტინის გაგზავნილ დელეგაციაში არც ერთი მინისტრი არ არის წარმოდგენილი და მოლაპარაკებებში არც პუტინი იქნება ჩართული.

"რუსული დელეგაციის საკმაოდ დაბალი დონის მიუხედავად, პრეზიდენტი ტრამპის, თურქეთის მაღალი რანგის დელეგაციისა და პრეზიდენტი ერდოღანის პატივისცემის გამო და სურვილით, დეესკალაციის პირველ ნაბიჯებს მაინც მივაღწიოთ და ომი დავასრულოთ, მე გადავწყვიტე სტამბოლში ჩვენი დელეგაცია გამეგზავნა, მაგრამ არა ყველა," — თქვა ზელენსკიმ.

დელეგაციაში მონაწილეობას არ მიიღებს უკრაინის უსაფრთხოების სამსახურის მეთაური ვასილი მალიუკი და გენშტაბის მეთაური, ანდრიი გნატოვი.

"თუმცა დელეგაციას გაუძღვება უკრაინის თავდაცვის მინისტრი, მიუხედავად იმისა, რომ იქ რუსეთის მხრიდან ამავე რანგის წარმომადგენელი არ იქნება," — თქვა ზელენსკიმ.

ზელენსკის განმარტებით, შეხვედრა უნდა გაიმართოს თურქეთის, ამერიკის, უკრაინისა და რუსეთის წარმომადგენლების დასწრების ფორმატში, ხოლო თავდაცვის მინისტრმა უმეროვმა იცის — უკრაინული, რუსული, ინგლისური და თურქული ენები.

ასევე იხილეთ: