სასამართლო პროცესზე, სადაც თიბისი ბანკის დამფუძნებლების, მამუკა ხაზარაძისა და ბადრი ჯაფარიძის აღკვეთ ღონისძიებაზე მსჯელობენ პროკურატურამ მოითხოვა, რომ შეეზღუდოთ საზღვრის კვეთა უწყების თანხმობის გარეშე. ბრალდების მხარემ მოტივად რამდენიმე ფაქტორი დაასახელა:

"154-ჯერ აქვს საღვარი გადაკვეთილი და გვაქვს საფუძველი რომ შეძლებს საქმიანობის დაწყებას უცხოეთში და მეტყველებს მის შესაძლებლობაზე დატოვოს საქართველოს საზღვრები და ისარგებლოს მისი კონტაქტებით", — განაცხადა პროკურორმა.

ბრალდების მხარემ სტრასბურგის სასამართლოს მიღებული გადაწყვეტილებები მოიყვანა მაგალითად და განაცხადა, რომ ბრალდებულის საერთაშორისო კონტაქტები საკმარის საფუძვლად ჩაითვალა.

"ასევე არსებობს მაღალი ალბათობა, რომ მან ზეგავლენა მოახდინოს მის მამხილებელ მოწმეებზე. არსებობს მოწმეებთან გარიგებაში შესვლის საფრთხე. საქმეში არის ფარული მიყურადების ჩანაწერები, სადაც თიბისი ბანკში ბრალდებულები გადიან კონსულტაციებს”, — განაცხადა პროკურორმა.

გარდა ამისა, პროკურატურა ჯამში 2-მილიონიან გირაოს ითხოვს, რასაც ხაზარიძე-ჯაფარიძე არ ეთანხმებიან.

ხაზარაძესა და ბადრი ჯაფარიძეს პროკურატურამ ფულის გათეთრების საქმეზე წარუდგინა ბრალი. ბრალდებულები პროცესებს ანაკლიის პორტს უკავშირებენ და აცხადებენ, რომ "ხელისუფლების წინააღმდეგობის მიუხედავად, ანაკლიის პორტი მაინც აშენდება". ხელისუფლება ბრალდებებს უარყოფს და ყველას მოუწოდებს, ჯაფარიძე-ხაზარაძის საქმე ანაკლიის პორტს არ დაუკავშირონ.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

თიბისი გრუპის 97%-მა ხაზარაძე და ჯაფარიძე ხელახლა აირჩია თავმჯდომარედ და მოადგილედ.

28 ივნისს გავრცელდა ინფორმაცია, რომ თიბისი ბანკის დამფუძნებლები მამუკა ხაზარაძე და ბადრი ჯაფარიძე თიბისის აქციების დაახლოებით 8%-ს დროებით გაასხვისებას აპირებენ. ამის შესახებ განცხადება ლონდონის საფონდო ბირჟაზე გამოქვეყნდა.

9 ივლისს მამუკა ხაზარაძემ განაცხადა, რომ აფუძნებს საზოგადოებრივ მოძრაობას. ხაზარაძის ინფორმაციით, მეგობრებთან და თანამოაზრეებთან, სხვადასხვა სფეროს პროფესიონალებთან ერთად სექტემბერში დააფუძნებს და მთავარი მიზანი ქვეყნის გაერთიანება და მისი დამოუკიდებლობის და თავისუფლების შენარჩუნება იქნება.

გაიგეთ მეტი: რა ვიცით თიბისის საქმეზე — ყველაფერი მოკლედ