ქართული ტურიზმის მხარდასაჭერად, DDB Betterfly-ს გუნდმა ინიციატივა შეიმუშავა. მათ შექმენს www.workfromgeorgia.com, რომელიც ვირტუალური, საერთო სამუშაო სივრცის განხორციელებული იდეაა. ეს არის უფასო პლატფორმა, სადაც საქართველოს ნებისმიერ კომპანიასა თუ სტარტაპს შეეძლება, მასპინძლად დარეგისტრირება, რის შემდეგაც, ნებისმიერი ქვეყნის ტურისტი, მათ ოფისში, დაჯავშნის ადგილს.

Marketer-ის ცნობით, მსოფლიოში მოგზაურების გარკვეული სეგმენტის, ციფრული მომთაბარეების (Digital Nomads) რიცხვი სწრაფად იზრდება. პროფესიონალების ჯგუფია, რომლებიც არ მუშაობენ ერთი, კონკრეტული ადგილმდებარეობიდან, არამედ მოგზაურობენ მსოფლიოს გარშემო და არ ელოდებიან შვებულებებს.

"ეს ყველაფერი განვითარებული ქვეყნების მაცხოვრებლებზე უფრო ვრცელდება, იქ, სადაც შემოსავალიც და ხარჯებიც დიდია, ამიტომ მოგზაურობა და უცხო ქვეყნებში თვეებით დარჩენა მათთვის უფრო მეტ აზრს იძენს", — წერს Marketer.

"საქართველო იდეალური ადგილია ასეთი მოგზაურებისთვის: დაბალი ხარჯები, მარტივი სამუშაო პირობები, 365 დღიანი უვიზო რეჟიმი სხვადასხვა ქვეყნის მოქალაქეებისათვის და ეს ყველაფერი მდიდარი კულტურის, ისტორიის, ულამაზესი ბუნების და რაც მთავარია — გულღია და სტუმართმოყვარე ხალხის ფონზე.

ასე რომ, რატომაც არა?! რატომ არ მოვიპატიჟოთ Digital nomads ჩვენს კომპანიებში სამუშაოდ?! გვაქვს რამდენიმე თავისუფალი, კეთილმოწყობილი ადგილი და შეგვიძლია, ჩამოსულ სტუმრებს დღის განმავლობაში კომფორტული სამუშაო სივრცე, საღამოს კი გართობა შევთავაზოთ", — უთხრა Marketer-ს DDB Betterfly-მ.

workfromgeorgia-ს უკვე შემოუერთდნენ კომპანიები: Leavingstone, Windfor’s, Holmes & Watson, Saatchi & Saatchi, Mr. Wolf, Kraken, McCann, Mozaika, BRID, JWT Metro, Gepra, ABK.