ევროპის დღე ყოველწლიურად 9 მაისს აღინიშნება. წელს, ამ თარიღთან დაკავშირებული ღონისძიება თბილისში, შაბათს, დილის 12 საათიდან ექსპო ჯორჯიაში მრავალფეროვანი და ენერგიული ღონისძიებით დაიწყება, რომელიც თავს უყრის ევროკავშირის წევრ ქვეყნებს, პარტნიორ ორგანიზაციებს, კულტურის სფეროს წარმომადგენლებს და ფართო საზოგადოებას, რათა კიდევ ერთხელ გაესვას ხაზი ევროკავშირისა და საქართველოს პარტნიორობის მნიშვნელობას.

წელს ევროკავშირსა და საქართველოს შორის პარტნიორობის 30 წლის იუბილე აღინიშნება — თანამშრომლობისა და საერთო ღირებულებების სამი ათწლეული.

ექსპო ჯორჯიაში დაგხვდებათ ცოცხალი წარმოდგენები, ევროკავშირის 27 წევრი ქვეყნის გამოფენები, მრავალფეროვანი სახალისო და საგანმანათლებლო აქტივობები, მუსიკა და ჩვენი საერთო ღირებულებების შთამბეჭდავი დღესასწაული.

რაც შეეხება ღონისძიების დეტალებს — ერთ-ერთი მნიშვნელოვანი სივრცე მე-4 და მე-5 პავილიონები იქნება, სადაც "ევროპის გუნდის“ წარმოგიდგენთ ევროკავშირის წევრი ქვეყნების არაჩვეულებრივ ისტორიებს.

მე-11 პავილიონი ევროკავშირი-საქართველოს პარტნიორობის 30 წელსა და ევროკავშირის პროექტებს შეეხება. აქ ექვსი თემატური სივრცე იქნება, რომელიც მოიცავს ეკონომიკურ განვითარებას, ციფრულ ტრანსფორმაციას, დემოკრატიას, გარემოს დაცვას, კულტურასა და ახალგაზრდობას.

წელს მე-4 პავილიონი პოდკასტის სტუდიად გადაიქცევა. დღის განმავლობაში სხვადასხვა წამყვანი საინტერესო სტუმრებთან ერთად მნიშვნელოვან თემებს განიხილავს: რას ნიშნავს ევროპა დღეს ქართველი ხალხისთვის? როგორია ჩვენი საერთო მომავალი? რა გვაერთიანებს საზღვრებსა და თაობებს მიღმა?

მე-3 პავილიონში პრაქტიკული ვორკშოპები იქნება იმაზე თუ როგორ ცვლის ხელოვნური ინტელექტი ჩვენს ყოველდღიურ ცხოვრებას, როგორ გაიკვლიო გზა ხელოვნური ინტელექტისა და დეზინფორმაციის სამყაროში, როგორ შეიტანო განაცხადი Erasmus+-ის გაცვლით პროგრამაში და მიიღო მონაწილეობა კონკურსში “ევროკავშირის პრიზი ჟურნალისტიკაში.”

გარე სივრცეში FAO-ს აგრომარკეტი იქნება, სადაც სტუმრებს შეეძლებათ აღმოაჩინონ ქართული ადგილობრივი გემოები, ხელნაკეთი პროდუქცია და ინიციატივები, რომლებიც უფრო მწვანე და მდგრად მომავალს ქმნის. საოჯახო ზონაში სპეციალური აქტივობები იქნება ბავშვებისთვის და ინტერაქციული ფოტო-ჯიხურები. დღის ბოლოს კი ღონისძიება კონცერტით დაიხურება.

შეგახსენებთ, ევროპის დღე, რომელიც ყოველწლიურად, 9 მაისს აღინიშნება, საფრანგეთის საგარეო საქმეთა მინისტრის, რობერტ შუმანის 1950 წლის დეკლარაციის პატივსაცემად დაწესდა. სწორედ 76 წლის წინ წარადგინა შუმანმა იდეა ევროპაში პოლიტიკური თანამშრომლობის ახალი ფორმის შესახებ, რომელიც ევროპის ქვეყნებს შორის ქვანახშირისა და ფოლადის მარაგების გაზიარებას ითვალისწინებდა და ევროპაში ომს წარმოუდგენელს ხდიდა. რეალობად ქცეული იდეა, რომელსაც დღეს ევროკავშირი ჰქვია, ვითარდება, წარმატებით მუშაობს, მშვიდობასა და კეთილდღეობას ემსახურება და 27 ქვეყანის მასშტაბით, 447 მილიონამდე ადამიანს აერთიანებს.