ოსკარის მფლობელმა პაველ ტალანკინმა ჯილდო ნიუ-იორკში, სტუდენტებთან შეხვედრაზე საჩვენებლად წაიღო, თუმცა ახლა მისი ადგილსამყოფელი უცნობია. დოკუმენტური ფილმისთვის, მისტერ არავინ პუტინის წინააღმდეგ, დაჯილდოებული ტალანკინი იძულებული გახდა, ოქროს ქანდაკება ნიუ-იორკის აეროპორტში ბარგში ჩაებარებინა.

ტალანკინის განცხადებით, ოთხშაბათს, გერმანიაში გამგზავრებისას, მას ჯილდო ხელბარგში ჰქონდა მოთავსებული, თუმცა ჯონ კენედის სახელობის საერთაშორისო აეროპორტის უსაფრთხოების სამსახურმა ის შეაჩერა. მათ მიზეზად დაასახელეს ის გარემოება, რომ ქანდაკება შესაძლოა გამოყენებული ყოფილიყო როგორც იარაღი. გერმანიაში დაფრენის შემდეგ კი აღმოჩნდა, რომ ოსკარი გამქრალია.

ავიაკომპანია Lufthansa-მ, რომლის თანამშრომლებიც ტალანკინს ჯილდოს ყუთში შეფუთვაში დაეხმარნენ (რადგან მას ჩასაბარებელი ბარგი საერთოდ არ ჰქონდა), განაცხადა, რომ მომხდარს განსაკუთრებული ყურადღებითა და ოპერატიულობით სწავლობენ. კომპანიის განმარტებით, მიმდინარეობს მასშტაბური შიდა მოკვლევა ჯილდოს მოსაძებნად. მათ ოფიციალურ განცხადებაში ნათქვამია: "ჩვენ ღრმად ვწუხვართ შექმნილი სიტუაციის გამო. ჩვენი გუნდი ყველაფერს აკეთებს, რათა ოსკარი რაც შეიძლება სწრაფად ვიპოვოთ და პატრონს დავუბრუნოთ".

BBC დაუკავშირდა კინემატოგრაფიული ხელოვნებისა და მეცნიერების აკადემიას და აშშ-ის ტრანსპორტის უსაფრთხოების ადმინისტრაციას (TSA), რომელმაც ტალანკინს ქანდაკების სალონში შეტანა აუკრძალა. დოკუმენტური ფილმის აღმასრულებელმა პროდიუსერმა, რობინ ჰესმანმა აღნიშნა, რომ ის აეროპორტში უსაფრთხოების სამსახურთან მოლაპარაკებისას ტალანკინს ტელეფონით ეხმარებოდა, რადგან რეჟისორი ინგლისურს თავისუფლად ვერ ფლობს.

ჰესმანის თქმით, ტალანკინს წელს მოგებული ოსკარითა და ბაფტათი აშშ-ის შიდა და საერთაშორისო რეისებზე ბევრჯერ უმგზავრია და აქამდე პრობლემა არასოდეს შექმნია. "ლეონარდო დიკაპრიოს მსგავსი რამ არ დაემართებოდა", — დასძინა მან.

პაველ ტალანკინი, რომელიც წლის საუკეთესო სრულმეტრაჟიანი დოკუმენტური ფილმის თანარეჟისორი და მთავარი გმირია, ჯილდოს ხშირად დაატარებს სხვადასხვა ჩვენებებსა და ღონისძიებებზე. ნიუ-იორკში ვიზიტისას, ფილმის ჩვენების შემდეგ გამართულ დისკუსიაზე, მან ქანდაკება სტუდენტებსაც დაათვალიერებინა. BBC-მ ასევე იხილა ვიდეოკადრები, სადაც ჩანს, როგორ ფუთავენ Lufthansa-ს თანამშრომლები ოსკარს წებოვანი ლენტისა და დამცავი მასალის გამოყენებით. ცნობისთვის, აკადემიის ჯილდო სიმაღლეში 34 სანტიმეტრია და თითქმის 4 კილოგრამს იწონის. მისი დამზადების ღირებულება 400-დან 1000 დოლარამდე მერყეობს.

დოკუმენტური ფილმი მისტერ არავინ პუტინის წინააღმდეგ ასახავს ომის პროპაგანდის გაძლიერებას იმ რუსულ სკოლაში, სადაც ტალანკინი მუშაობდა 2022 წლის თებერვალში, უკრაინაში რუსეთის შეჭრის შემდეგ. უსაფრთხოების მიზნით, ის ამჟამად ემიგრაციაშია და ევროპაში ცხოვრობს. რუსეთმა აღნიშნული ფილმი სამ სტრიმინგ პლატფორმაზე აკრძალა "ექსტრემიზმისა და ტერორიზმის პროპაგანდის" ბრალდებით.