აზერბაიჯანის მილი მეჯლისმა (პარლამენტმა) "აზერბაიჯანის წინააღმდეგ ევროპარლამენტის საქმიანობის შესახებ" გადაწყვეტილება მიიღო. ინფორმაციას აზერბაიჯანული მედია ავრცელებს.

გადაწყვეტილებაში აღნიშნულია, რომ აზერბაიჯანის რესპუბლიკის მილი მეჯლისი უცხო ქვეყნების პარლამენტებთან და საერთაშორისო საპარლამენტო ორგანიზაციებთან ურთიერთობისას ხელმძღვანელობს მშვიდობის, უსაფრთხოებისა და მდგრადი განვითარების მიზნით და ხელს უწყობს ღია, გულწრფელ და კონსტრუქციულ დიალოგს, რომელიც ეფუძნება საპარლამენტო ღირებულებებსა და საერთო ინტერესებს.

გადაწყვეტილებაში მითითებულია, რომ, სამწუხაროდ, ევროპარლამენტის დესტრუქციული პოზიცია, რომელიც უარყოფს ზემოხსენებულ პრინციპებს, მთავარ დაბრკოლებად იქცა ამ ორგანოსთან ორმხრივი და მრავალმხრივი თანამშრომლობის განვითარების გზაზე.

"ევროპარლამენტის საქმიანობის არსი საერთაშორისო სამართლის ნორმებისა და პრინციპების, სამართლიანობის კონცეფციის კატეგორიული უარყოფაა. ეს ინსტიტუტი განუწყვეტლივ უგულებელყოფს სომხეთის მიერ ჩვენი მიწების 30-წლიან ოკუპაციას, ჩვენი ასობით ქალაქისა და სოფლის, ისტორიული, რელიგიური და კულტურული ძეგლის განადგურებას, ეთნიკურ წმენდას და მილიონზე მეტი ლტოლვილისა და იძულებით გადაადგილებული პირის ადამიანის უფლებებს. პლატფორმები, რომლებიც ევროპარლამენტთან თანამშრომლობისთვის იყო გამიზნული — ევროკავშირი-აზერბაიჯანის საპარლამენტო თანამშრომლობის კომიტეტი და "ევრონესტის" საპარლამენტო ასამბლეა — ზეწოლის, შანტაჟისა და შიდა საქმეებში უხეში ჩარევის ინსტრუმენტებად იქცა.

მიუხედავად იმისა, რომ აზერბაიჯანის რესპუბლიკის მილი მეჯლისმა 2015 წელს ამ დამოკიდებულების გამო ევროპარლამენტთან ყველანაირი ურთიერთობა შეწყვიტა, მოგვიანებით მან მეორე მხარის მრავალი მოწოდებისა და დაპირების საფუძველზე აღადგინა თანამშრომლობა. ამის მიუხედავად, ევროპარლამენტმა არ შეასრულა თავისი დაპირებები და თანმიმდევრულად განაგრძო ანტიაზერბაიჯანული პოლიტიკა, ცილისწამების კამპანია", — წერია გავრცელებულ ინფორმაციაში.