რამდენიმე დღის წინ ლონდონის ცენტრში ახალი ქანდაკება გამოჩნდა, რომელზეც კვარცხლბეკიდან ჩამომავალი კაცია გამოსახული.

ბენქსიმ დაადასტურა, რომ ქანდაკება, რომელიც ცენტრალურ ლონდონში ღამით განთავსდა, მისი ნამუშევარია.

ინსტალაცია Waterloo Place-ზე ღამით გამოჩნდა, დაუნინგ-სტრიტიდან დაახლოებით 450 მეტრში. იგი ედუარდ VII-ის ქანდაკებისა და ყირიმის ომის მემორიალის სიახლოვეს დგას.

ბევრმა ივარაუდა, რომ ეს ქუჩის იდუმალი მხატვრის, ბენქსის, უახლესი ნამუშევარია, რადგან ქანდაკების ძირში სწორედ მისი ხელმოწერა იკითხება. როგორც წესი, ხელოვანი საკუთარი ნამუშევრების შესახებ ინსტაგრამზე პოსტს დებს, ახალი პოსტები კი ჯერ არ გამოქვეყნებულა.

კოსტიუმში გამოწყობილი კაცის ძეგლი შესაძლოა პოლიტიკოსს განასახიერებდეს. ამ ვარაუდს კიდევ უფრო ამყარებს ის ფაქტი, რომ დაუნინგ-სტრიტი, სადაც დიდი ბრიტანეთის მთავრობის რეზიდენციაა განთავსებული, ქანდაკების სიახლოვეს მდებარეობს. კაცს სახეს აფრიალებული დროშა უფარავს, ვერაფერს ხედავს და ისე ვარდება კვარცხლბეკიდან. სცენა მიმდინარე მოვლენების საკმაოდ ზუსტი აღწერაა.

ბენქსი ცოტა ხნის წინ ისევ მოექცა მედიის ყურადღების ცენტრში, როდესაც Reuters-მა მისი ვინაობის გამამჟღავნებელი მასალა გამოაქვეყნა.

გამოძიების თქმით, მათ ხელთ უდავო მტკიცებულებები აქვთ, რომლებიც ეფუძნება 2022 წელს უკრაინაში მხატვრის მოგზაურობას, ყოფილი თანამშრომლების მიერ გამოქვეყნებულ ფოტოებსა და ხელნაწერ აღიარებას, რომელიც 2000 წელს, ნიუ-იორკში მისი დაკავებისას დაიწერა.

Reuters-ის სტატიის მიხედვით, ბენქსი, სინამდვილეში, ბრისტოლელი რობინ განინგემია, რომელიც ახლა 51 წლისაა. თუმცა, როგორც გამოძიებაშია აღნიშნული, მან ვინაობის დასამალად სახელი წლების წინ შეიცვალა და ახლა უფრო გავრცელებულ სახელს — დევიდ ჯონსს იყენებს.

ბენქსი თავის ვინაობას ყოველთვის საიდუმლოდ ტოვებდა, რათა დიდებისგან შექმნილი ჩარჩოების გარეშე ემუშავა. ეს ანონიმურობა მას პოლიციისგან თავის დასაცავადაც ეხმარებოდა.