ქართულმა ოცნებამ უკვე მეათედ შეცვალა საგადასახადო კოდექსი — ეს ცვლილებები თამბაქოს ინდუსტრიის დაბეგვრის წესებსაც შეეეხო. 2026 წლის 1 იანვრიდან იმპორტირებულ სიგარეტზე აქციზი მნიშვნელოვნად გაიზარდა, ხოლო ადგილობრივ წარმოებაზე — შემცირდა.

ცვლილების ავტორები ამ გადაწყვეტილებას ადგილობრივი წარმოების წილის ზრდით და ეკონომიკური ბერკეტების გააქტიურებით ხსნიან. თუმცა, განმარტებით ბარათში არ არის დაკონკრეტებული, რამდენ კომპანიას შეეხება შეღავათი და რა ზარალს მიიღებს სახელმწიფო ბიუჯეტი.

სტუდია "მონიტორის" გამოძიებაში ვკითხულობთ, რომ იმპორტირებული სიგარეტზე აქციზის გადასახადი 85 თეთრით გაიზარდა (1.30-დან 2.75 ლარამდე). ადგილობრივი წარმოების სიგარეტზე კი 60 თეთრით შემცირდა (1.9-დან 1.3 ლარამდე).

ფაქტობრივად, სიგარეტის ადგილობრივი წარმოება საქართველოში მხოლოდ ერთ კომპანიას — "თბილისის თამბაქოს" უკავშირდება, რომელიც ვანო ჩხარტიშვილის ოჯახს ეკუთვნის და ბოლო წლებში მრავალმილიონიან მოგებას აფიქსირებს. მიუხედავად იმისა, რომ ადგილობრივ პროდუქციაზე გადასახადი შემცირდა, ბაზარზე ფასები მაინც გაიზარდა.

ვინ არის ბიზნესმენი ვანო ჩხარტიშვილი?

ბიზნესმენ ვანო ჩხარტიშვილის ოჯახის საკუთრება შპს "თბილისის თამბაქოა". აქციების 50-50%-იან წილებს მისი შვილები, მიხეილ და ნათია ჩხარტიშვილები ინაწილებენ.

ფინანსური ანგარიშებიდან ჩანს, რომ კომპანიის შემოსავლები მაღალია — 2022 წელი: 19,7 მილიონი ლარი წმინდა მოგება დააგროვა, 2023 წელი — 11.7 მილიონი ლარი, 2024 წელს — 14.7 მილიონი ლარი.

სტუდია მონიტორის განცხადებით, ვანო ჩხარტიშვილი საქართველოს ერთ-ერთი უმდიდრესი ბიზნესმენია.

"ჩხარტიშვილი სხვადასხვა დროს იკავებდა მაღალ პოლიტიკურ თანამდებობებს, იყო სახელმწიფო მინისტროს მოადგილე და ეკონომიკის მინისტრი, შემდეგ კი მე-6 მოწვევის (2004-2008) პარლამენტის წევრი. მისი სახელი დაკავშირებულია მედიაში გავრცელებულ რამდენიმე სკანდალთან," — ვკითხულობთ სტატიაში.

გარდა სიმდიდრისა, ჩხარტიშვილმა ბიძინა ივანიშვილის გულის მოგებაც შეძლო — "ვანო ჩხარტიშვილმა ყველაზე მეტი ანგარიში გამიწია ნებისმიერი ბიზნესმენისგან განსხვავებით და ყველაზე მეტად დაიხია უკან, რისთვისაც მე მადლიერებას გამოვხატავ" — ამ სიტყვებით ახასიათებს ივანიშვილი ჩხარტიშვილს 2018 წელს.

სტუდია მონიტორის სრული გამოძიება იხილეთ აქ.