აზერბაიჯანელ ჟურნალისტ აფგან სადიგოვს საერთაშორისო პასპროტი მისცა — ჯერ-ჯერობით უცნობია შეძლებს თუ არა სადიგოვი ქვეყნის დატოვებას.

"აფგან სადიგოვმა უცხოური პასპორტი მიიღო. თუმცა ეს საერთოდ არ ნიშნავს, რომ მის წინააღმდეგ არსებული ძებნა სისტემიდან მოხსნილია, რადგან სერვისების განვითარების სააგენტოს თანამშრომლებიც არაერთხელ აღნიშნავენ, რომ პრობლემა კვლავ არსებობს.

ამას სინანულით ვამბობ — ჩვენი შემდეგი მიზანი ქვეყნის დატოვებაა. რატომ ვამბობ ამას სინანულით? იმიტომ, რომ სამშობლოს დატოვება ადამიანისთვის ყველაფრის დაკარგვას ჰგავს. მაგრამ სხვა გზა არ გვაქვს," — წერს სადიგოვის მეუღლე სევინჩ სადიგოვა.

საქართველოში აზერბაიჯანელი ჟურნალისტის უფლებადამცველი ორგანიზაცია სოციალური სამართლიანობის ცენტრის ხელმძღვანელი თამთა მიქელაძე სოციალურ ქსელში წერს, რომ "რეჟიმის გეგმების შესახებ უფრო მეტს მხოლოდ მაშინ გავიგებთ, როცა აფგან სადიგოვი აზერბაიჯანიდან გასვლას და მის ოჯახთან გაერთიანებას შეძლებს".

"მნიშვნელოვანია, რომ აფგან სადიგოვს უკვე აქვს პასპორტი.

მაგრამ რეჟიმის გეგმების შესახებ უფრო მეტს მხოლოდ მაშინ გავიგებთ, როცა აფგან სადიგოვი აზერბაიჯანიდან გასვლას და მის ოჯახთან გაერთიანებას შეძლებს, რომელიც თითქმის 2 წელია არ უნახავს.

მხოლოდ ამის შემდეგ შეგვიძლია ჩავთვალოთ, რომ პროცესი უსაფრთხო დასასრულისკენ მიდის", — წერს მიქელაძე.

შეგახსენებთ, 27 აპრილს სადიგოვმა ASAN Xidmət-ის ცენტრს უცხოეთის პასპორტის მისაღებად მიმართა. აზერბაიჯანელი ჟურნალისტი და პროევროპული აქციების აქტიური მონაწილე აფგან სადიგოვი 4 აპრილის ღამით დააკავეს. ღამის 4 საათზე კი მოსამართლე თორნიკე ქოჩქიანმა მისი აზერბაიჯანში გაძევების შესახებ გადაწყვეტილება მიიღო.

სადიგოვის დაკავებას საფუძვლად დაედო 1-ელ აპრილს სოციალურ ქსელში აზერბაიჯანულ ენაზე გამოქვეყნებული ფეისბუკპოსტი, რომელშიც ეწერა — "იქ, სადაც დიქტატურაა, პოლიციელები მზად არიან ხელფასისა და "პაგონების" სანაცვლოდ ყველაფერი გაყიდონ და ფეხქვეშ გათელონ და ამას სიამოვნებით, მთელი გულით და სიამაყით აკეთებენ."

მეტი აფგან სადიგოვის შესახებ წაიკითხეთ აქ.