მმართველი პარტიის დეპუტატი არჩილ თალაკვაძე აცხადებს, რომ რუსეთის დუმის დეპუტატმა, სერგეი გავრილოვმა "გამოიყენა შესაძლებლობა" და "პოლიტიკურად პროვოკაციული ჟესტი გააკეთა". ის ამტკიცებს, რომ მყისიერი რეაქცია ჰქონდათ, ასამბლეა შეწყვიტეს და მოითხოვეს რუს დეპუტატებს დაეტოვებინათ საქართველო. ამის შესახებ მან TV პირველის ეთერში განაცხადა.

წამყვანის კითხვაზე, მნიშვნელობა აქვს გავრილოვი სპიკერის სავარძელში დაჯდებოდა თუ დეპუტატის, თალაკვაძე პასუხობს: "რუსეთის დუმის დეპუტატების ადგილი საქართველოს პარლამენტში არ არის, ვიდრე საქართველოს ოკუპაცია გრძელდება".

თალაკვაძემ აღნიშნა, რომ მათი ინფორმაციით სხდომას ბერძენი კოლეგა უნდა გაძღოლოდა. ჟურნალისტის დამაზუსტებელ კითხვაზე, თუნდაც ბერძენი დეპუტატს ჩაეტარებინა სხდომა, შეუქმნიდა თუ არა მას უხერხულობას ის ფაქტი, რომ რუსი დეპუტატები მის ან სხვა სკამზე დაჯდებოდნენ, ის პასუხობს: "არავის სავარძელზე.. პარლამენტში საერთოდ არ არის ადგილი რუსი დეპუტატების".

მას შემდეგ, რაც ევროპულმა საქართველომ გავრილოვის პარლამენტის თავმჯდომარის სკამზე დაჯდომა გააპროტესტა, მმართველი პარტიის დეპუტატმა, მამუკა მდინარაძემ განაცხადა, რომ სესია პარლამენტში ვეღარ გაგრძელდებოდა. მისი თქმით, ასამბლეა ნეიტრალურ ტერიტორიაზე გაგრძელდებოდა.