ჰომოფობიური აქციების ორგანიზატორი, გურამ ფალავანდიშვილი დააკავეს. ინფორმაცია On.ge-ს შინაგან საქმეთა სამინისტროში დაუდასტურეს.

"უკანონო ფორმირების შექმნის, ხელმძღვანელობის და მასში გაწევრიანების ფაქტებზე დაწყებული გამოძიების ფარგლებში, პოლიცია გურამ ფალავანდიშვილთან, გამოკითხვაზე დაბარების მიზნით, უწყების ჩასაბარებლად მივიდა. ფალავანდიშვილმა სამართალდამცველებს წინააღმდეგობა გაუწია და სიტყვიერი შეურაცხყოფა მიაყენა", — აღნიშნავენ შსს-ში.

მათივე თქმით, პოლიციამ ის ადმინისტრაციულ სამართალდარღვევათა კოდექსის 173-ე მუხლით დააკავა, რაც პოლიციელის კანონიერი მოთხოვნისადმი დაუმორჩილებლობას გულისხმობს.

ფალავანდიშვილი თბილისი პრაიდის წინააღმდეგ გამართული აქციების ერთ-ერთი ორგანიზატორი იყო. აქციებზე მან არაერთხელ გააჟღერა ძალადობრივი შინაარსის მოწოდება.