შინაგან საქმეთა სამინისტრომ ცეცხლსასროლი და ცივი იარაღის შეძენა-შენახვის ბრალდებით 2 პირი დააკავა.

1999 წელს დაბადებული, ქურდობისთვის პირობითი მსჯავრის ქვეშ მყოფი პირი დაკავებულია წარსულში ნასამართლევი პირის მიერ ცივი იარაღის ტარების ბრალდებით. მეორე ბრალდებული კი ცეცხლსასროლი იარაღის უკანონო შეძენა-შენახვისა ბრალდებით.

შსს-ს ინფორმაციით, ბრალდებულები პატრულ-ინსპექტორებმა თბილისში, გორგასლის ქუჩაზე, გადამოწმების მიზნით შეაჩერეს.

"მათი ვიზუალური დათვალიერების შედეგად, სამართალდამცველებმა "ეკოლ პ 29"-ის მოდელის ცეცხლსასროლი იარაღი და დანა ნივთმტკიცებად ამოიღეს. დაკავებულების პირადი ჩხრეკისას, ასევე, ამოღებულია პირბადეები და პოლიეთილენის ბახილები", — ვკითხულობთ განცხადებაში.

ბრალდება 4-დან 7 წლამდე ვადით თავისუფლების აღკვეთას ითვალისწინებს.