ევროკავშირის მოქალაქეები ამ კვირაში ევროპარლამენტში თავიანთ წარმომადგენლობას ირჩევენ. არჩევნები 23 მაისიდან დაიწყო და 26 მაისის ჩათვლით გაგრძელდება. საარჩევნო პროცესი დიდი ბრიტანეთი-ნიდერლანდებიდან დაიწყო და კვირის ბოლომდე 28-ვე ქვეყანაში გაიმართება. საბოლოო შედეგებს კვირას, 26 მაისს, ბრიუსელის, დროით 23 საათზე გამოაცხადებენ. მანდატებისთვის შვიდი პოლიტიკური გაერთიანება იბრძვის, მათ შორის ოთხი მკაფიოდ პროევროპულად მიიჩნევა, დანარჩენი კი ევროსკეპტიკოსად.

საქართველოს პოლიტიკის ინსტიტუტის დირექტორი, კორნელი კაკაჩია On.ge-სთან საუბარში განმარტავს, რომ ამ არჩევნების შედეგს, თუ როგორ დაკომპლექტდება პარლამენტი, დიდი მნიშვნელობა აქვს მთლიანად აღმოსავლეთ პარტნიორობის ქვეყნებისთვის. მისივე თქმით, ევროპარლამენტი, სავარაუდოდ, ახალი დეპუტატებით დაკომპლექტდება და როგორც ხელისუფლებას, ისე ოპოზიციასა თუ სამოქალაქო სექტორს, ხელახალი ურთიერთობების დამყარება მოუწევთ:

"ის ურთიერთობები, რომლებიც წლების განმავლობაში იყო ჩამოყალიბებული, პირადი ნაცნობობა, თუ ლობირება... მემკვიდრეობა შენარჩუნდება, პარტიები იგივეა, მაგრამ ადამიანები იცვლებიან, მოდიან სულ სხვა "ბექგრაუნდით". მმართველ პარტიას ხელახალი ძალისხმების გაწევა დასჭირდება, რათა საქართველოს საკითხმა არ გადაიწიოს მეორე პლანზე. ამას დრო დასჭირდება, მაგრამ აუცილებლად მოხდება, თუ ევროსკეპტიკოსებმა არ გაიმარჯვეს, რა თქმა უნდა".

კაკაჩიას თქმით, წევრ სახელმწიფოებში ევროსკეპტიციზმის მომძლავრების მიუხედავად, მოლოდინი არსებობს, რომ მათი ხმები არ იქნება გადამწყვეტი. იგი ასევე ვარაუდობს, იმასაც, რომ შეიძლება, ევროსკეპტიკოსებმა გარკვეული პრობლემები შექმნან ბიუჯეტის გამოყოფასთან დაკავშირებით:

"ჩვენ როცა ვსაუბრობთ ევროინტეგრაციაზე, ეს საკითხი მათთვის, ბუნებრივია, მიუღებელია. ზოგიერთ მათგანს შეხმატკბილებული ურთიერთობა აქვს რუსულ პოლიტიკურ ელიტასთან... არის ქვეყნები, სადაც მათი გავლენა დიდია, მაგალითად ავსტრია, სადაც კოალიციაში შედიოდნენ. სხვა ქვეყნებშიც საკმაოდ წარმომადგენლობითი არიან. ბუნებრივია, მათ აქვთ გავლენა, თავიანთ სახელმწიფოში. ისინი გამოიყენებენ ამ ტრიბუნას, რათა საერთო ევროპული იდეა დააკნინონ. მითუმეტეს იმ ფონზე, როდესაც ფაქტობრივად ბრექსიტი ამ პარლამენტის შემადგენლობის დროს განხორციელდება".

მისივე თქმით, ტრადიციული პარტიების გამარჯვების მოლოდინი არსებობს და შესაძლოა, ეს იყოს ევროპის სახალხო პარტია ან "სოციალისტები".

ყველაზე დიდი გაერთიანება, რომელიც არჩევნებში მონაწილეობს, ევროპის სახალხო პარტიაა (EPP). იგი ევროკავშირის ქვეყნების მემარჯვენე-ცენტრისტებსა და ქრისტიან-დემოკრატიულ პარტიებს აერთიანებს. მთავარი მემარცხენე-ცენტრისტული გაერთიანებაა სოციალისტები და დემოკრატები (S&D). არსებობს ლიბერალების ფრაქცია ALDE და ჯგუფი მწვანეები, რაც აერთიანებს გარემოსდაცვით პოლიტიკურ ძალებს. მეხუთე ჯგუფია ევროპელი კონსერვატორები და რეფორმისტები (ECR), რომელიც პროევროპულ ბანაკსა და ევროსკეპტიკოსებს შორისაა. ევროსკეპტიკოსების ჯგუფია ევროპის გაერთიანებული მემარცხენეები (GUE) სოციალისტური და კომუნისტური პარტიებით. ახალი გაერთიანებაა ხალხისა და ერთა ევროპული ალიანსი (EAPN).

ევროპის პარლამენტის არჩევნების კენჭისყრა 23 მაისიდან დაიწყო