imedinews-ის ინფორმაციით, თელავის ერთ-ერთი სოფელში ბებიამ ათი წლის შვილიშვილს სცემა. ტელეკომპანიის ცნობით, ბავშვი მიყენებული დაზიანებებით თელავის რეფერალურ საავადმყოფოში გადაიყვანეს. ექიმის თქმით, ბავშვს სახეზე და სხეულის სხვადასხვა ადგილზე დალურჯებები აღენიშნებოდა. შესაბამისი მკურნალობის შემდეგ ის სახლში გაწერეს.

შინაგან საქმეთა სამინისტროში On.ge-ს უთხრეს, რომ ბებიას შემაკავებელი ორდერი გამოუწერეს, ხოლო ძალადობის მსხვერპლ ბავშვზე და მის ძმაზე დროებითი ზრუნვა მამიდას დაეკისრა. ფაქტზე გამოძიება სისხლის სამართლის კოდექსის 126-ე მუხლით დაიწყო, რაც გულისხმობს ოჯახის ერთი წევრის მიერ ოჯახის სხვა წევრის მიმართ ძალადობას, რამაც ფიზიკური ტანჯვა გამოიწვია.

იმედის ინფორმაციით, არასრულწლოვანის მშობლები საქართველოში არ არიან, რის გამოც ბავშვი ბებიასთან იზრდებოდა.