EU-ის სანქციების 21-ე პაკეტში ყულევის ნავთობგადამამუშავებელი ქარხნისა და ქართული კრიპტოპლატფორმების შეყვანის შესახებ ევროკომისიის პრესსპიკერი შიბონ მაკგარიმ "ევროსკოპის" შეკითხვას უპასუხა. მისი თქმით, სანქციების 6-თვიანი გადავადება დაუშვეს იმისათვის, რომ მფლობელებს მიეცეთ საშუალება, ჩამოშორდნენ რუსულ ნავთობს. თუ კომისია მიიჩნევს, რომ ეს ვალდებულებები შესრულდა, ყულევი აღარ იქნება სიაში.

"სანქციების ამ პაკეტში ჩვენ შევიტანეთ წინადადება ყულევის სანქციების სიაში დამატების შესახებ. როგორც იცით, მიმდინარეობს დისკუსიები გადამამუშავებელი ქარხნის მფლობელებთან, რომლებმაც აიღეს ვალდებულება, რომ მოახდენენ დივერსიფიკაციას და უარს იტყვიან რუსულ ნავთობზე. ჩვენ გვსურს, რომ ეს ვალდებულებები შესრულდეს. სწორედ ამიტომ, დავუშვით 6-თვიანი გადავადება, რათა მფლობელებს მიეცეთ საშუალება, ჩამოშორდნენ რუსულ ნავთობს. თუ კომისია მიიჩნევს, რომ ეს ვალდებულებები შესრულდა, ყულევი აღარ იქნება სიაში. ხოლო თუ ვალდებულებები არ შესრულდება, საბჭოს შევთავაზებთ, რომ ის დარჩეს სანქცირებულთა სიაში", — განაცხადა შიბონ მაკგარიმ.

რაც შეეხება ქართული კრიპტოპლატფორმების დასანქცირებას, ევროკომისიის პრესსპიკერმა განაცხადა, რომ "ინდივიდუალურად შეიყვანეს სიაში გარკვეული პლატფორმები, რომლებიც სისტემატურად გამოიყენებოდა სანქციებისთვის გვერდის ავლისა და რუსეთის მიერ თანხების გადასარიცხად".

"ხელთ არ მაქვს ზუსტი ციფრები ქართული კრიპტო კომპანიების რაოდენობაზე, რომლებიც ამ პაკეტში მოხვდნენ. პრესრელიზში აღნიშნულია სულ 14 პლატფორმაა, რომელთა შორის ნაწილი ქართულია. ინდივიდუალურად შევიყვანეთ სიაში გარკვეული პლატფორმები, რომლებიც სისტემატურად გამოიყენებოდა სანქციებისთვის გვერდის ავლისა და რუსეთის მიერ თანხების გადასარიცხად. ჩვენ გვსურს, წერტილი დავუსვათ ასეთ ქმედებებს", — თქვა პრესსპიკერმა.