ახალციხეში, სოფელ წყრუთში მდინარის ადიდების გამო სოფელი დაიტბორა. TOK2Region-ის ცნობით, ერთ ოჯახთან მისასვლელი გზა წყალმა წაიღო. ოჯახის წევრები სახლიდან გამოსვლას ვერ ახერხებენ. რეგიონული მედია წერს, რომ სახლში 3 მცირეწლოვანი ბავშვი და ჯანმრთელობის პრობლემების მქონე მამამთილი ჩარჩნენ.

სოფელ წყრუთში წვიმა დაახლოებით საღამოს 6-7 საათზე დაიწყო, რა დროსაც მცირე ზომის მდინარე ადიდდა. სოფელში მძიმე ტექნიკა მუშაობს. TOK2Region-ის ცნობით, ტრაქტორი ტერიტორიის გასაწმენდად 21:28 წუთზე მოვიდა.

ახალციხის მერს, ვარლამ წიკლაურს ვკითხეთ სახლში ჩარჩენილი მოქალაქეების გამოყვანის შესახებ, ის გვეუბნება რომ ოჯახის წევრებს არ სურთ სახლის დატოვება. იმავეს ამბობენ ოჯახის ის წევრები, რომლებიც სახლში არ იმყოფებიან. როგორც ადგილობრივები ამბობენ, მსგავსი შემთხვევა ამავე სოფელში 2-3 წლის წინაც იყო.

ამას გარდა, ადიგენის სოფელ გომაროში მეწყერი ჩამოწვა. კადრებს ადგილიდან რეგიონული მედია ავრცელებს. მათი ცნობით, მეწყერი ამ ტერიტორიაზე გასულ წელსაც ჩამოწვა. ადგილობრივების თქმით, ადგილზე ტექნიკა იყო და ტერიტორიის ნაწილი გაწმინდა. სტიქიის ზონიდან დამატებითი დეტალები ჯერ-ჯერობით უცნობია.